گجرات میں ڈمپر کی ٹکر سے موٹرسائیکل سوار جاں بحق

پیروشاہ چوک کے قریب تیز رفتار ڈمپر نے موٹر سائیکل کو کچل دیا، ایک شخص موقع پر جاں بحق، دوسرا شدید زخمی

گجرات کے علاقے پیروشاہ چوک کے قریب افسوسناک ٹریفک حادثے میں ایک موٹر سائیکل سوار جان کی بازی ہار گیا جبکہ دوسرا شدید زخمی ہو گیا۔ تفصیلات کے مطابق دو افراد موٹر سائیکل پر سوار جا رہے تھے کہ اچانک تیز رفتار ڈمپر ٹرک نے انہیں ٹکر مار دی۔

حادثے کے نتیجے میں 35 سالہ شخص موقع پر ہی جاں بحق ہو گیا جبکہ دوسرا فرد زخمی حالت میں قریبی اسپتال منتقل کیا گیا۔ عینی شاہدین کے مطابق حادثہ ڈمپر ڈرائیور کی لاپرواہی اور تیز رفتاری کے باعث پیش آیا۔ مرنے والا اور زخمی ہونے والا شخص بالترتیب گاؤں مرزا اور جلال پور صوبتیاں کے رہائشی بتائے جاتے ہیں۔

مقامی شہریوں نے ٹریفک حادثات کی بڑھتی ہوئی شرح پر شدید تشویش کا اظہار کرتے ہوئے انتظامیہ سے مطالبہ کیا ہے کہ پیروشاہ چوک اور اطراف میں ٹریفک نظم و ضبط کے مؤثر اقدامات کیے جائیں۔