گجرات، تھانہ ڈنگہ کی حدود میں واقع گاؤں سیکریالی کے قریب ایک افسوسناک واقعہ پیش آیا جس میں اکبر علی کو فائرنگ کر کے قتل کر دیا گیا۔
پولیس کے مطابق، واقعے میں ملزمان صابر حسین اور احسان صابر نے اکبر علی پر فائرنگ کی، جس سے وہ موقع پر ہی جاں بحق ہو گیا، جبکہ حملہ آور فرار ہونے میں کامیاب ہو گئے۔
واقعے کی اطلاع ملتے ہی پولیس نے فوری کارروائی کرتے ہوئے مقتول کے بھائی اصغر علی کی مدعیت میں مقدمہ درج کر لیا۔ ایف آئی آر میں صابر حسین اور احسان صابر کو براہِ راست قتل کا ذمہ دار ٹھہرایا گیا ہے، جبکہ ایک اور شخص حسنین کو مشورہ دینے کے الزام میں شریکِ ملزم نامزد کیا گیا ہے۔ پولیس کے مطابق مقتول اور ملزمان کے درمیان رشتہ داری کا تعلق بھی تھا، جس کی بنیاد پر ذاتی رنجش کو واقعے کا محرک قرار دیا جا رہا ہے۔
پولیس کا کہنا ہے کہ تفتیش جاری ہے اور جلد ملزمان کو گرفتار کر کے قانون کے کٹہرے میں لایا جائے گا۔
یاد رہے کہ ڈنگہ اور گردونواح میں حالیہ عرصے میں ذاتی دشمنیوں اور خاندانی تنازعات پر مبنی پرتشدد واقعات میں اضافہ دیکھنے میں آیا ہے، جس پر شہریوں نے تحفظات کا اظہار کیا ہے اور امن و امان کے قیام کے لیے مؤثر اقدامات کا مطالبہ کیا ہے۔
