ڈی پی او گجرات مہر محمد ریاض نے شادیوال میں محرم کے مرکزی جلوس کے مقامات کا دورہ کیا اور پولیس کو الرٹ رہنے اور فول پروف سیکیورٹی یقینی بنانے کی ہدایت کی۔
گجرات: ڈی پی او گجرات مہر محمد ریاض نے محرم الحرام کے دوران امن و امان کی فضا کو برقرار رکھنے اور شہریوں کے تحفظ کو یقینی بنانے کے لیے شادیوال میں مرکزی جلوس کے روٹس اور حساس مقامات کا تفصیلی دورہ کیا۔ انہوں نے موقع پر موجود پولیس افسران اور اہلکاروں کو ہدایت کی کہ محرم کے دوران ہر ممکن حفاظتی اقدامات کیے جائیں، اور کسی قسم کی کوتاہی یا غفلت برداشت نہیں کی جائے گی۔
ڈی پی او مہر محمد ریاض نے جلوس کے راستوں پر نصب کیمروں، داخلی و خارجی راستوں، اور ناکہ بندی پوائنٹس کا بھی جائزہ لیا اور ضروری ہدایات جاری کیں۔ شہریوں کے جان و مال کا تحفظ پولیس کی اولین ترجیح ہے، اور اس مقصد کے لیے تمام اہلکار ہمہ وقت الرٹ رہیں۔
انہوں نے مزید کہا کہ محرم الحرام کے دوران حساس مقامات پر اضافی نفری تعینات کی جا رہی ہے، جبکہ جلوس کے راستوں پر فول پروف سیکیورٹی کو یقینی بنانے کے لیے پولیس کے ساتھ ساتھ ایلیٹ فورس اور خفیہ ادارے بھی متحرک رہیں گے۔ ڈی پی او نے مقامی امن کمیٹیوں اور منتظمین سے بھی ملاقات کی اور باہمی تعاون پر زور دیا تاکہ محرم کے ایام پُرامن طریقے سے گزر سکیں۔
یاد رہے کہ محرم الحرام کے دوران گجرات سمیت پنجاب بھر میں سیکیورٹی ہائی الرٹ کی گئی ہے، اور حساس اضلاع میں پولیس، رینجرز اور دیگر قانون نافذ کرنے والے ادارے مشترکہ طور پر گشت اور نگرانی کا عمل جاری رکھے ہوئے ہیں۔
