ڈنگہ میں موٹر سائیکل سوار مسلح افراد نے فیکٹری ملازم کو لوٹ لیا، 98 ہزار روپے اور دیگر سامان چھین کر فرار، پولیس نے مقدمہ درج کر کے تفتیش شروع کر دی۔
ڈنگہ، نواحی علاقے میں مسلح ڈکیتی کی واردات کے دوران دو موٹر سائیکل سوار ملزمان نے فیکٹری سے واپسی پر گھر جا رہے ایک مزدور کو گن پوائنٹ پر لوٹ لیا۔ متاثرہ شخص سے 98 ہزار روپے نقدی اور دیگر قیمتی اشیاء چھین کر ملزمان موقع سے فرار ہو گئے۔
متاثرہ فیکٹری ملازم نے بتایا کہ وہ معمول کے مطابق کام سے فارغ ہو کر گھر جا رہا تھا کہ راستے میں موٹر سائیکل پر سوار دو نامعلوم افراد نے اسے روکا، اسلحہ دکھا کر دھمکایا اور تمام رقم چھین کر فرار ہو گئے۔ متاثرہ شخص نے فوری طور پر تھانہ ڈنگہ میں رپورٹ درج کروائی، جس پر پولیس نے مقدمہ درج کر کے تفتیش کا آغاز کر دیا ہے۔
پولیس کا کہنا ہے کہ واقعے کی تفتیش جدید خطوط پر کی جا رہی ہے، قریبی سی سی ٹی وی کیمروں اور شواہد کی مدد سے ملزمان کی شناخت اور گرفتاری کی کوشش کی جا رہی ہے۔
یاد رہے کہ ڈنگہ اور گرد و نواح میں حالیہ دنوں میں ڈکیتی اور راہزنی کی وارداتوں میں اضافہ ہوا ہے، جس کے باعث شہریوں میں شدید تشویش پائی جاتی ہے۔
