پاکستان مسلم لیگ پنجاب کے جنرل سیکرٹری، صوبائی وزیرصنعت وتجارت چوہدری شافع حسین نے کہا کہ وزیراعلیٰ پنجاب مریم نوازشریف سے گجرات ڈویژن کے حوالے سے اہم میٹنگ کی ہے، انشاءاللہ جلد گجرات ڈویژن بحال ہوجائے گا اس سلسلے میں تمام انتظامات کو حتمی شکل دی جا رہی ہے۔
چوہدری شافع حسین نے کہا کہ گجرات شہر میں سیف سٹی پراجیکٹ پر تیزی سے کام جاری ہے جسکو جلد مکمل کرنے کے بعد باقائدہ افتتاح کیا جائے گا۔
انہوں نے کہا کہ گجرات شہرکے سیوریج کے مسائل سے بخوبی آگاہ ہیں انشاءاللہ الیکشن میں کیے گئے وعدے کو عملی جامہ پہنانے کے لیے ورلڈ بینک کے تعاون سے انٹرنیشنل معیار کے مطابق سیوریج سسٹم تعمیر کیا جائے گا جسکے لیے ورلڈ بینک کی ٹیم جلد گجرات شہر کا سروے کرتے ہوئے حتمی سفارشات مرتب کرے گی۔
گجرات شہر میں ترقیاتی منصوبوں کے لیے پنجاب حکومت سے کثیر تعداد میں فنڈز منظور کروا لیے ہیں جن پر جلد معیاری اور دیرپا تعمیراتی کاموں کا آغاز ہوگا اور تمام علاقوں میں بلا تفریق و امتیاز اپنی نگرانی میں کام مکمل کروائیں گے۔
انہوں نے کہا کہ خاندانی خدمت مشن پر گامزن ہیں، خالی دعوؤں اور نعروں کے بجائے عملی اقدامات میری ترجیع ہیں اور آنے والے دنوں میں شہری بہتری محسوس کریں گے۔
ان کا کہنا تھا کہ الیکشن میں کیے گئے تمام اعلانات کو پایہ تکمیل تک پہنچانا ہی میری ترجیع ہے جس پر کوئی کمپرومائز نہیں ہوگا۔
