چوہدری شافع حسین نے گورنمنٹ کالج آف ٹیکنالوجی علامہ اقبال ٹاؤن میں 19 سینٹرز آف ایکسیلینس بنانے کے منصوبے کا سنگ بنیاد رکھ دیا۔
تفصیلات کے مطابق منصوبے کے تحت ٹیوٹا کے 16 اور پنجاب ووکیشنل اینڈ ٹریننگ کونسل کے 3 اداروں میں سینٹرز آف ایکسیلینس بنیں گے، پنجاب میں سینٹرز آف ایکسیلینس کے قیام کا منصوبہ ہنر مند افرادی قوت کی تیاری میں سنگ میل کی حیثیت رکھتا ہے۔
تقریب سے خطاب کے دوران چوہدری شافع کا کہنا تھا کہ منصوبے کی تکمیل سے ان اداروں کی استعداد کار اور پیشہ ورانہ فنی مہارت میں اضافہ ہوگا۔
وزیرصنعت و تجارت پنجاب چوہدری شافع حسین نے کہا کہ اس پراجیکٹ کے تحت ٹیکنیکل اور ووکیشنل ایجوکیشن تک رسائی آسان ہوگی، نوجوانوں کو باعزت روزگار کے مواقع میسر آئیں گے۔
انہوں نے مزید کہا کہ اس پراجیکٹ کے تحت 8 مختلف ترجیحی اقتصادی شعبہ جات کا انتخاب کیا گیا ہے جن میں انفارمیشن کمیونیکیشن، ٹیکنالوجی، صحت اور مہمان نوازی، تعمیرات، ٹیکسٹائل اینڈ گارمنٹس، لائٹ انجینئرنگ، ایگری کلچر فارم مشینری اور جراحی کے آلات، آٹوموبائل، آٹو بائک اسمبلنگ اور فوڈ پراسیسنگ کے شعبے شامل ہیں۔
دوسری جانب وزیر اعلی پنجاب مریم نواز شریف کی ہدایات پر ضلع گجرات میں اپنی چھت اپنا گھر پروگرام کی درخواستوں کا عمل جاری ہے۔
پروگرام کے تحت 7 سال کی مدت تک 15 لاکھ روپے بلا سود قرضہ دیا جائے گا اس سلسلہ میں شہریوں کی راہنمائی کے لیے ڈی سی کمپلیکس میں انفارمیشن کاؤنٹر قائم کیا گیا ہے۔
