نجی کمپنی کی زیرزمین پائپ لائن سے کروڑوں روپے کا کروڈ آئل چوری، چار ملزمان نامزد

راولپنڈی کے رنیال گاؤں میں نجی آئل کمپنی کی زیرزمین پائپ لائن سے 12,821 بیرل کروڈ آئل چوری کا انکشاف، 25 کروڑ روپے سے زائد مالیت کے معاملے میں چار ملزمان کے خلاف مقدمہ درج۔

راولپنڈی کے رنیال گاؤں میں نجی آئل کمپنی کی زیرزمین پائپ لائن سے کروڑوں روپے مالیت کے کروڈ آئل چوری ہونے کا انکشاف ہوا ہے۔

پولیس کے مطابق ملزمان نے آئل کی مین سپلائی لائن میں چوری کے لیے غیر قانونی کنکشن بنایا اور ڈمپر کے اندر ٹینک بنا کر بجری میں چھپا رکھا تھا۔ ایف آئی آر کے مطابق چوری شدہ آئل کی مقدار 12,821 بیرل تھی جس کی مالیت 25 کروڑ 48 لاکھ 81 ہزار 480 روپے بنتی ہے۔

تحقیقات کے دوران آئل چوری کی جگہ سے اسلحہ اور ایمونیشن بھی برآمد ہوئی،نجی کمپنی کے چیف ایگزیکٹو ایڈمن کی مدعیت میں مقدمہ درج کیا گیا ہے اور شرافت علی، محمد بلال، محمد واجد اور محمد ایوب کو نامزد کیا گیا ہے۔

پولیس نے مزید کارروائی اور دیگر ملزمان کی گرفتاری کے لیے چھاپے شروع کر دیے ہیں۔