گوجرانوالہ کے پوش علاقے ماڈل ٹاؤن میں جائیداد کا تنازع ایک المناک سانحے میں تبدیل ہو گیا، جہاں چھوٹے بھائی نے فائرنگ کرکے اپنے ہی بڑے بھائی کی جان لے لی۔
پولیس کے مطابق مقتول شاہد معمول کے مطابق اپنی دکان کے باہر بیٹھا ہوا تھا کہ اچانک اس کا چھوٹا بھائی زاہد آیا اور اس پر اندھا دھند گولیاں برسا دیں۔ گولیاں لگنے سے شاہد موقع پر ہی دم توڑ گیا، جبکہ قاتل بھائی موقع سے فرار ہونے میں کامیاب ہو گیا۔
پولیس نے لاش تحویل میں لے کر پوسٹ مارٹم کے لیے اسپتال منتقل کر دی ہے اور جائے وقوعہ سے شواہد اکٹھے کرنے کے بعد تفتیش کا آغاز کر دیا ہے۔ ابتدائی تحقیقات کے مطابق دونوں بھائیوں کے درمیان جائیداد کی تقسیم پر کافی عرصے سے شدید تنازع چل رہا تھا، جس نے بالآخر خونی شکل اختیار کر لی۔
پولیس کا کہنا ہے کہ ملزم زاہد کی گرفتاری کے لیے چھاپے مارے جا رہے ہیں، اور جلد اسے قانون کے کٹہرے میں لایا جائے گا۔
یاد رہے کہ خاندانی جائیداد کے جھگڑے ملک بھر میں متعدد جانیں نگل چکے ہیں، تاہم ایسے واقعات کی روک تھام کے لیے اب تک کوئی مؤثر سماجی یا قانونی اقدامات نہیں کیے جا سکے۔
