کراچی، کورنگی کے علاقے میں دوستی کے رشتے کو عشق کے تنازع نے خون میں نہلا دیا، جہاں ایک نوجوان اپنے ہی دوست کے ہاتھوں زندگی سے محروم ہو گیا۔
تفصیلات کے مطابق، زمان ٹاؤن تھانے کی حدود میں واقع کوسٹ گارڈ چورنگی، نورانی بستی میں منگل اور بدھ کی درمیانی شب ایک جھگڑا اس وقت جان لیوا ثابت ہوا جب ایک نوجوان کو تیز دھار آلے کے وار سے قتل کر دیا گیا، لاش کو چھیپا ایمبولینس کے ذریعے جناح اسپتال منتقل کیا گیا۔
ایس ایچ او غلام نبی آفریدی کے مطابق مقتول کی شناخت 24 سالہ بلال ولد جاوید ارشد کے نام سے کی گئی ہے، جو ایک فیکٹری میں ملازمت کرتا تھا، پولیس کے مطابق بلال اور اس کے دوست احسان کے درمیان ایک لڑکی سے محبت کے معاملے پر تنازع چل رہا تھا۔
پولیس کو موصول ہونے والے ایک عینی شاہد کے بیان کے مطابق احسان نے خنجر سے حملہ کر کے بلال کو موت کے گھاٹ اتار دیا، واقعے کے بعد احسان، شہریار، عرفان اور دیگر افراد موقع سے فرار ہوگئے۔
تاحال واقعے کا مقدمہ درج کرانے کے لیے کوئی مدعی سامنے نہیں آیا، تاہم پولیس نے تحقیقات کا آغاز کر دیا ہے اور ملزمان کی تلاش جاری ہے۔
