لاہور: آن لائن جوئے میں ملوث 4 بکیے گرفتار

لاہور کے علاقے جوہر ٹاؤن میں پولیس نے ایک کامیاب کارروائی کے دوران آن لائن جواء کروانے والے 4 بکیوں کو گرفتار کر لیا۔ گرفتار افراد میں عبدالحفیظ، غلام مرتضیٰ، علی رضا اور حمزہ نواز شامل ہیں۔

پولیس کے مطابق ملزمان ایشیا کپ سمیت غیر ملکی لیگز کے میچز پر بھی جواء کرواتے تھے۔ گرفتار بکیوں نے حالیہ پاک بھارت ایشیا کپ میچ پر بھی جواء لگایا تھا۔ دورانِ کارروائی ملزمان کے قبضے سے 4 موبائل فونز اور 40 ہزار 500 روپے سے زائد نقدی برآمد ہوئی۔

ابتدائی تفتیش میں انکشاف ہوا ہے کہ یہ افراد مختلف موبائل ایپ اکاؤنٹس کے ذریعے گروپ جواء کرواتے تھے، اور ان کا نیٹ ورک ورلڈ کپ سمیت دیگر انٹرنیشنل میچز تک پھیلا ہوا تھا۔

ایس پی صدر رانا حسین طاہر کے مطابق ملزمان کے خلاف مقدمات درج کر لیے گئے ہیں اور مزید تفتیش جاری ہے۔ ایس پی نے کارروائی کرنے والی ٹیم اور ایس ایچ او جوہر ٹاؤن کو شاباش بھی دی۔