ایف آئی اے کمپوزٹ سرکل گوادر نے سمندر کے راستے غیر قانونی طور پر ایران جانے کی کوشش کرنے والے 17 افراد کو گرفتار کر لیا۔ گرفتار افراد کا تعلق پاکستان کے مختلف علاقوں سے ہے۔
ایف آئی اے حکام کے مطابق، یہ کارروائی جیوانی کے علاقے میں عمل میں لائی گئی۔ گرفتار افراد میں 5 کا تعلق بونیر، 3 کا ساہیوال، 2 گوجرانوالہ، 2 منڈی بہاء الدین سے جبکہ دیگر کا تعلق وہاڑی، لاہور، لودھراں، گجرات اور کراچی سے ہے۔
ترجمان ایف آئی اے کے مطابق، گرفتار افراد میں ایرانی شہری بھی شامل ہیں۔ تمام افراد غیر قانونی طریقے سے ایران کے راستے دیگر ممالک میں داخل ہونے کی کوشش کر رہے تھے۔
ابتدائی تفتیش میں انکشاف ہوا ہے کہ ملزمان کا ارادہ تھا کہ ایران کے بعد وہ دوسرے ممالک میں غیر قانونی طور پر داخل ہو سکیں۔ ان کے خلاف مقدمات درج کر لیے گئے ہیں اور تفتیش کا آغاز ہو چکا ہے۔
بیرون ملک ملازمت کا جھانسہ: ایف آئی اے کی کارروائی، انسانی اسمگلرز گرفتار
یاد رہے کہ اس سے قبل بھی ایف آئی اے نے دو انسانی اسمگلرز زبیر احمد اور ارشاد کو گوادر سے گرفتار کیا تھا، جو شہریوں کو سمندر کے راستے ایران بھجوانے میں ملوث تھے۔
