ریجنل ٹیکس آفس ون نے اپنی تحقیقات میں ایک اہم پیشرفت کرتے ہوئے آئرن اور اسٹیل سیکٹر میں 315 ارب روپے کا میگا سیلز ٹیکس فراڈ پکڑلیا۔
کراچی: ریجنل ٹیکس آفس ون (RTO-I) نے آئرن اور اسٹیل سیکٹر میں ہونے والے 315 ارب روپے کے میگا سیلز ٹیکس فراڈ کا سراغ لگا لیا ہے، جس میں ملوث دو مرکزی کرداروں سمیت متعدد معاونین کو گرفتار کر لیا گیا ہے۔
تحقیقات کے دوران انکشاف ہوا کہ یہ فراڈ پلاٹینم انٹرنیشنل اور کے ایچ سنز کے پلیٹ فارم سے کیا گیا، جس میں اویس اسماعیل اور فرہاد کو ماسٹر مائنڈ قرار دیا گیا ہے۔ ان کی معاونت کرنے والوں میں فرہاد کا بھائی شہزاد، کزن فیصل اور ایک اور ساتھی معروف الرحمان شامل ہیں۔
ریجنل ٹیکس آفس ون کے حکام نے جمعہ کے روز گرفتار ملزمان کو اسپیشل کورٹ کسٹمز، ٹیکسیشن و اینٹی اسمگلنگ میں پیش کیا۔ عدالت نے مقدمے کی سماعت کرتے ہوئے فیصل اور معروف الرحمان کو جیل بھیج دیا، جبکہ شہزاد کو 7 روزہ جسمانی ریمانڈ پر ٹیکس حکام کے حوالے کر دیا گیا ہے۔
ریجنل ٹیکس آفس نے اس میگا فراڈ میں مزید ملوث افراد کی تلاش اور شواہد اکٹھا کرنے کے لیے تفتیش کا دائرہ وسیع کر دیا ہے۔
چیف کمشنر آر ٹی او ون، ڈاکٹر فہیم محمد نے اپنی ٹیم کو اس بڑی کارروائی پر سراہتے ہوئے کہا کہ "یہ کارروائی اس بات کا ثبوت ہے کہ ادارہ ٹیکس چوری جیسے جرائم کو کسی صورت برداشت نہیں کرے گا۔ ہم قانون کے مطابق تمام ملوث عناصر کے خلاف سخت کارروائی کریں گے تاکہ آئندہ ایسے جرائم کی روک تھام کی جاسکے۔”
