لاہور،فیڈرل انویسٹی گیشن ایجنسی (ایف آئی اے) کی جانب سے لاہور میں کارروائیاں کر کے انسانی ا سمگلنگ میں ملوث ریڈ بک کے انتہائی مطلوب انسانی اسمگلر سمیت 4 ملزمان کو گرفتار کر لیا گیا۔
ترجمان ایف آئی اے کا بتانا ہے کہ زیر حراست ملزمان کی شناخت راحیل پرویز، محمد عمر، یمام ندیم اور روحان محمود کے نام سے ہوئی، گرفتار ملزمان سادہ لوح شہریوں سے ویزا فراڈ کرنے میں ملوث پائے گئے۔
ملزمان کو ماڈل ٹاؤن، رحمان گارڈن اور شمع لاہور سے گرفتار کیا گیا، گرفتار ملزم راحیل پرویز ریڈ بک کا مطلوب انسانی سمگلر ہے۔
ایف آئی اے کے مطابق ملزم سال 2019 سے انسداد انسانی اسمگلنگ سرکل لاہور کو مطلوب تھا، ملزم نے شہریوں کو کینیڈا بھجوانے کی غرض سے 90 لاکھ روپے بٹورے، دیگر ملزمان غیر قانونی ٹریول ایجنسی چلا رہے تھے۔
ملزمان نے شہریوں کو بیرون ملک ملازمت کا جھانسہ دیکر لاکھوں روپے بٹورے، ملزمان بغیر لائسنس شہریوں سے پاسپورٹ وصول کر رہے تھے، ملزمان بھاری رقوم وصول کر کے ویزا فراڈ کرتے تھے۔
ایف آئی اے کا بتانا ہے کہ چھاپوں کے دوران ملزمان سے 12 پاکستانی پاسپورٹس، تعلیمی دستاویزات اور موبائل سمز برآمد ہوئیں، ملزمان بھاری رقوم وصول کرنے کے بعد روپوش ہو جاتے تھے۔
ملزمان برآمد ہونے والے پاسپورٹس سے متعلق حکام کو مطمئن نہ کر سکے، ملزمان کو گرفتار کر کے تفتیش کا آغاز کر دیا گیا ہے۔
