قومی اسمبلی کے بعد سینیٹ میں بھی قائد حزب اختلاف کی نشست خالی ہو گئی ہے۔ سینیٹ سیکرٹریٹ نے پاکستان تحریک انصاف (پی ٹی آئی) کے رہنما سینیٹر شبلی فراز کو عہدے سے ہٹانے کا باضابطہ نوٹیفکیشن جاری کر دیا۔
سینیٹ سیکرٹریٹ کے مطابق یہ اقدام الیکشن کمیشن کی جانب سے شبلی فراز کو نااہل قرار دیے جانے کے فیصلے کے بعد کیا گیا۔ نوٹیفکیشن کے تحت نااہلی کا اطلاق 5 اگست 2025 سے ہو گا، جس کے نتیجے میں ان کی سینیٹ کی رکنیت اور اپوزیشن لیڈر کا منصب دونوں ختم تصور ہوں گے۔
شبلی فراز کو آئین کے آرٹیکل 63 کے تحت نااہل قرار دیا گیا تھا۔ اس فیصلے کے بعد قومی اسمبلی میں قائد حزب اختلاف عمر ایوب اور سینیٹ میں شبلی فراز سمیت پی ٹی آئی کے 9 اراکین پارلیمان کی رکنیت ختم کر دی گئی۔
شبلی فراز، عمر ایوب سمیت پی ٹی آئی کے 9 سینیٹرز اور ارکانِ اسمبلی نااہل قرار
قبل ازیں قومی اسمبلی سیکرٹریٹ بھی اپوزیشن لیڈر کا عہدہ خالی قرار دینے کا نوٹیفکیشن جاری کر چکا ہے۔ یوں اس وقت پارلیمان کے دونوں ایوان قائد حزب اختلاف سے محروم ہیں۔
یہ پیش رفت انسداد دہشت گردی کی عدالت کی جانب سے 9 مئی کے مقدمات میں پی ٹی آئی رہنماؤں کو سزائیں سنائے جانے کے بعد سامنے آئی، جس کے بعد الیکشن کمیشن نے نااہلی کے فیصلے جاری کیے تھے۔
