لاہور کی انسدادِ دہشت گردی عدالت نے 9 مئی 2023 کو جناح ہاؤس حملے کے مقدمے میں گرفتار علیمہ خان کے بیٹے شاہ ریز خان کا 8 روزہ جسمانی ریمانڈ منظور کر لیا۔
نجی ٹی وی ڈان نیوز کے مطابق، شاہ ریز خان کو گزشتہ روز لاہور کے علاقے زمان پارک سے گرفتار کیا گیا تھا اور آج انہیں انسدادِ دہشت گردی عدالت میں پیش کیا گیا۔ پولیس نے ایک ماہ کے جسمانی ریمانڈ کی استدعا کی، تاہم ملزم کے وکیل سلمان اکرم راجہ نے اس کی مخالفت کی۔
عدالت نے فریقین کے دلائل سننے کے بعد پولیس کی 30 دن کی درخواست مسترد کر دی اور 8 روزہ جسمانی ریمانڈ منظور کرتے ہوئے ملزم کو 30 اگست کو دوبارہ عدالت میں پیش کرنے کا حکم دیا۔
شیرافضل مروت کا علیمہ خان پر شدید تنقید ، اسٹیبلشمنٹ سے روابط کا الزام
یاد رہے، تحریک انصاف کے بانی عمران خان کی ہمشیرہ علیمہ خان نے ایک روز قبل الزام عائد کیا تھا کہ ان کے بیٹے کو 4 مسلح افراد نے اغوا کیا ہے، جس کے بعد پولیس نے اس گرفتاری کی تصدیق کرتے ہوئے بتایا کہ شاہ ریز خان کو 9 مئی کے پُرتشدد واقعات کے سلسلے میں گرفتار کیا گیا ہے۔
