معروف یوٹیوبر رجب بٹ نے حالیہ تنازعات اور قانونی مسائل کے پیش نظر پاکستان چھوڑ دیا ہے اور وی لاگنگ سے عارضی طور پر کنارہ کشی اختیار کر لی ہے۔
سوشل میڈیا پر شہرت پانے والے رجب بٹ اس وقت مختلف مقدمات کا سامنا کر رہے ہیں، جن میں مذہبی حوالے سے حساس مواد کی اشاعت کا الزام بھی شامل ہے۔ اس حوالے سے لاہور ہائی کورٹ میں درخواست بھی دائر کی جا چکی ہے۔
رجب بٹ نے اپنی موجودہ رہائش کا انکشاف نہیں کیا، تاہم حالیہ ٹک ٹاک لائیو سیشن میں دبئی اور پاکستان کے وقت کا موازنہ کرتے ہوئے بیرون ملک موجودگی کا اشارہ دیا۔ لائیو گفتگو میں انہوں نے کہا کہ جب تک ان کی والدہ کی مکمل رضامندی شامل نہیں ہوگی، وہ یوٹیوب پر کوئی نیا وی لاگ اپلوڈ نہیں کریں گے۔
انہوں نے مزید بتایا کہ ان کی والدہ ان کی سلامتی کو لے کر شدید فکر مند ہیں اور اسی باعث انہوں نے بیٹے کو خود ایئرپورٹ پر الوداع کہا۔ رجب بٹ نے وضاحت کی کہ وہ وی لاگنگ کو مکمل طور پر ترک نہیں کر رہے بلکہ صرف موجودہ حالات بہتر ہونے تک سرگرمیاں معطل کر رہے ہیں۔ ان کے مطابق، وہ کچھ وضاحتی ویڈیوز پہلے ہی ریکارڈ کر چکے ہیں، جنہیں وقت آنے پر جاری کریں گے۔
رجب بٹ نے ٹک ٹاک پر لائیو سیشنز جاری رکھنے کا عندیہ بھی دیا ہے اور اپنے مداحوں سے صبر، حمایت اور سمجھداری کی اپیل کی ہے۔
