صحت کے ماہرین نے خبردار کیا ہے کہ ناشتہ نہ کرنا صرف توانائی کی کمی کا باعث نہیں بنتا بلکہ یہ ہڈیوں کی صحت کے لیے بھی سنجیدہ خطرہ بن سکتا ہے۔
ایک حالیہ تحقیق میں یہ بات سامنے آئی ہے کہ مسلسل ناشتہ چھوڑنے والے افراد میں ہڈیوں کی کمزوری اور آسٹیوپوروسس جیسے امراض کا خطرہ بڑھ جاتا ہے۔
ماہرین کا کہنا ہے کہ ناشتہ دن کی سب سے اہم غذا ہے، کیونکہ یہ جسم کو دن بھر کے لیے ضروری توانائی اور غذائیت فراہم کرتا ہے۔ خاص طور پر کیلشیم اور وٹامن ڈی سے بھرپور اشیاء جیسے دودھ، دہی، انڈے اور اناج، صبح کے وقت لینے سے ہڈیوں کو مضبوط بنانے میں اہم کردار ادا کرتے ہیں۔
تحقیق میں بتایا گیا ہے کہ انسانی ہڈیاں مسلسل ٹوٹنے اور دوبارہ بننے کے عمل سے گزرتی ہیں۔ اگر صبح کے وقت جسم کو مناسب غذائیت نہ ملے تو یہ قدرتی عمل متاثر ہوتا ہے، جس سے ہڈیوں کے کمزور ہونے اور فریکچر کا خطرہ بڑھ جاتا ہے۔
مزید برآں، محققین نے یہ بھی دریافت کیا کہ ناشتہ چھوڑنے سے جسم میں کورٹیسول نامی ہارمون کی مقدار بڑھ جاتی ہے، جو کہ ہڈیوں کی کثافت (bone density) میں کمی کا سبب بن سکتا ہے۔ وقت کے ساتھ ساتھ یہ تبدیلیاں ہڈیوں کے دیرپا مسائل اور آسانی سے ٹوٹنے جیسے خطرات پیدا کرتی ہیں۔
ماہرین صحت کا مشورہ ہے کہ ہڈیوں کی مضبوطی اور عمومی صحت کو برقرار رکھنے کے لیے دن کا آغاز ضرور کیلشیم سے بھرپور اور متوازن ناشتہ سے کریں۔ اس میں ڈیری مصنوعات، بادام، اناج، یا وٹامن ڈی سے بھرپور غذائیں شامل کی جا سکتی ہیں۔
