واشنگٹن: دنیا کی معروف ٹیکنالوجی کمپنی میٹا (Meta) نے فیس بک صارفین کے لیے ایک نئے اور انوکھے فیچر کا اعلان کیا ہے جس کا مقصد جیون ساتھی کی تلاش کو آسان بنانا ہے۔ اس فیچر کے تحت صارفین اب اے آئی (AI) اسسٹنٹ کی مدد سے اپنے پسند کا شریکِ حیات تلاش کر سکیں گے۔
بین الاقوامی خبر رساں ادارے کے مطابق، میٹا کا یہ فیچر خاص طور پر ان افراد کے لیے تیار کیا گیا ہے جو فیس بک کے ذریعے شادی یا طویل مدتی تعلقات قائم کرنا چاہتے ہیں۔ نیا AI اسسٹنٹ صارف کی ترجیحات، دلچسپیوں، شخصیت، اور دیگر عوامل کو مدنظر رکھتے ہوئے ممکنہ جیون ساتھی تجویز کرے گا۔
ٹیکنالوجی کے اس استعمال کو ماہرین ایک مثبت پیش رفت قرار دے رہے ہیں۔ ان کے مطابق، اب روایتی رشتے کرانے والے ادارے بھی AI ٹیکنالوجی کی مدد لینے لگے ہیں تاکہ بہتر نتائج حاصل کیے جا سکیں۔ ان کا کہنا ہے کہ AI کی مدد سے موزوں اور ہم آہنگ رشتے تلاش کرنا پہلے کی نسبت کہیں زیادہ مؤثر اور تیز رفتار ہو گیا ہے۔
میٹا کا کہنا ہے کہ یہ فیچر نہ صرف رشتے کی تلاش کو جدید اور سہل بنائے گا بلکہ صارفین کی پرائیویسی کو بھی اولین ترجیح دی جائے گی۔ اس کے ساتھ ساتھ، AI اسسٹنٹ مسلسل سیکھنے اور بہتری کے عمل سے گزرے گا تاکہ صارفین کو زیادہ بہتر مشورے اور تجاویز فراہم کی جا سکیں۔
یہ فیچر جلد فیس بک پر متعارف کروا دیا جائے گا، اور صارفین مرحلہ وار اس سروس سے فائدہ اٹھا سکیں گے۔ یہ اقدام ڈیجیٹل دنیا میں تعلقات کے قیام کی ایک نئی جہت قرار دیا جا رہا ہے۔
