ماسکو: روس میں ایک شخص نے بیوی کے ساتھ شاپنگ پر جانے سے بچنے کے لیے اپنی ہی گاڑی چوری ہونے کی جھوٹی کہانی گھڑ لی، جس کا پول چند ماہ بعد کھل گیا۔
غیر ملکی میڈیا کے مطابق یہ انوکھا واقعہ اپریل میں پیش آیا، تاہم علاقائی پولیس نے اکتوبر میں اس کا باضابطہ انکشاف کیا۔ پولیس کو ایک خاتون کی جانب سے ایمرجنسی نمبر پر کال موصول ہوئی تھی جس میں اطلاع دی گئی کہ ان کے شوہر کی کار گھر کے قریب پارکنگ سے چوری ہوگئی ہے۔
کچھ دیر بعد خاتون نے دوبارہ کال کر کے بتایا کہ گاڑی کراسنویارسک کے اوٹڈیخا جزیرے پر مل گئی ہے۔ جب پولیس جائے وقوعہ پر پہنچی تو گاڑی میں زبردستی داخل ہونے کے آثار اور اگنیشن سوئچ خراب پایا گیا، لیکن تفتیش کے دوران شوہر کے بیانات مشکوک لگنے لگے۔
مزید تحقیقات اور شواہد کے تجزیے کے بعد پولیس نے انکشاف کیا کہ اس شخص نے بیوی کے ساتھ شاپنگ پر جانے سے بچنے کے لیے اپنی ہی گاڑی کی چوری کا ڈرامہ رچایا تھا۔
پولیس نے واقعے کو "غیر ضروری وقت ضائع کرنے” اور "جھوٹی رپورٹ درج کروانے” کا کیس قرار دیا، جبکہ مقامی ذرائع کے مطابق اس شوہر کو اپنی حرکت پر سخت ندامت کا سامنا کرنا پڑا۔
