جاپان میں ایک انوکھا فراڈ سامنے آیا ہے جہاں ایک شخص نے خود کو روسی خلاباز ظاہر کر کے ایک خاتون سے ہزاروں ڈالرز ہتھیا لیے۔
رپورٹس کے مطابق جعلساز نے خاتون سے رابطہ کر کے دعویٰ کیا کہ وہ اس وقت بین الاقوامی خلائی اسٹیشن (ISS) میں موجود ہے اور خلا میں پھنس گیا ہے۔ اس نے خاتون کو یقین دلانے کے لیے خلا کی تصاویر اور خلائی مشن سے متعلق پیغامات بھی بھیجے۔
"جعلی خلاباز” نے کہا کہ زمین پر واپسی کے لیے ری انٹری فیس اور دیگر اخراجات ادا کرنے کی ضرورت ہے، جس کے لیے اسے مالی مدد درکار ہے۔ خاتون نے اس پر بھروسہ کرتے ہوئے تقریباً 6 ہزار 700 ڈالرز ادا کر دیے۔
بعد ازاں جب پولیس کو شکایت درج کرائی گئی تو انکشاف ہوا کہ یہ محض ایک آن لائن رومانس/فراڈ اسکیم تھی اور اس شخص کا خلا یا خلابازی سے کوئی تعلق نہیں تھا۔
ماہرین کے مطابق یہ واقعہ اس بات کی واضح مثال ہے کہ سوشل میڈیا اور ڈیجیٹل پلیٹ فارمز پر کس طرح جدید سائنسی مشنز یا غیر معمولی کہانیوں کا سہارا لے کر لوگوں کو دھوکہ دیا جا سکتا ہے۔
