بھارت کی ریاست اتر پردیش میں ایک حیران کن واقعہ پیش آیا جہاں فیس بک پر ہونے والی دوستی پہلے محبت اور پھر شادی میں بدل گئی، لیکن شادی کے بعد دولہا نے اپنی دلہن کو پہچاننے سے انکار کر کے سب کو حیران کر دیا۔
تفصیلات کے مطابق جھارکھنڈ کی ایک نوجوان لڑکی اور سون بھدر کے ایک نوجوان کے درمیان فیس بک پر تعلق قائم ہوا تھا۔ وقت کے ساتھ یہ تعلق گہرا ہوتا گیا، اور ویڈیو کالز اور پیغامات کے تبادلے کے بعد دونوں نے شادی کا فیصلہ کیا۔ کچھ ملاقاتوں کے بعد، جوڑا ایک مقامی مندر میں روایتی طریقے سے شادی کے بندھن میں بندھ گیا۔
تاہم، شادی کے بعد کہانی میں ایسا موڑ آیا جس نے سب کو حیران کر دیا۔ جب دلہن شوہر کے گھر پہنچی تو نوجوان نے نہ صرف اسے پہچاننے سے انکار کر دیا بلکہ مبینہ طور پر کہا: "معاف کرنا، تم کون ہو؟ میں تمہیں نہیں جانتا۔” دلہن اس غیر متوقع ردِعمل پر سکتے میں آ گئی اور وہیں پھوٹ پھوٹ کر رونے لگی۔
لڑکی نے الزام لگایا کہ اس نے نوجوان کے ساتھ نئی زندگی شروع کرنے کی خاطر اپنا خاندان چھوڑا، مگر اب اسے دھوکہ دیا جا رہا ہے۔ دلہن نے احتجاجاً گھر کے باہر دھرنا دے دیا، جس پر مقامی افراد اکٹھے ہو گئے اور معاملہ اتنا سنگین ہو گیا کہ پولیس کو مداخلت کرنا پڑی۔
جھنگ کے نوجوان کی محبت میں گرفتار امریکی خاتون پاکستان پہنچ گئی
بعد ازاں لڑکی نے مقامی تھانے میں تحریری شکایت درج کرائی جس میں اس نے الزام عائد کیا کہ نوجوان نے اسے فیس بک پر شادی کا جھانسہ دیا، مندر میں نکاح کیا اور اب اس رشتے سے انکاری ہو رہا ہے۔ اس نے مطالبہ کیا کہ اسے انصاف فراہم کیا جائے اور اس کے حقوق کا تحفظ یقینی بنایا جائے۔
پولیس حکام کا کہنا ہے کہ وہ اس معاملے کی مکمل تحقیقات کر رہے ہیں، جس میں شادی کی قانونی حیثیت اور لڑکی کے الزامات کا جائزہ لیا جائے گا۔ اگر الزامات درست ثابت ہوئے تو قانون کے مطابق کارروائی عمل میں لائی جائے گی۔
یہ واقعہ علاقے بھر میں موضوعِ بحث بنا ہوا ہے اور سوشل میڈیا پر بننے والے رشتوں کی حقیقت اور خطرات پر نئی بحث چھیڑ دی گئی ہے۔ یہ واقعہ اس بات کی علامت ہے کہ آن لائن تعلقات میں احتیاط اور حقیقت پسندی کس قدر ضروری ہو چکی ہے۔
