ایڈاہو میں ایک امریکی جوڑے نے شادی میں شرکت کے لیے 1 ہزار ڈالر کا ٹکٹ رکھا، 132 ہزار ڈالر جمع کر کے اسکول کی تعمیر کرنے والی این جی او کو عطیہ کر دیے۔
ایڈاہو، امریکی ریاست ایڈاہو میں دلہا دلہن نے اپنی شادی میں آنے والے مہمانوں کے لیے 1 ہزار ڈالر کا ٹکٹ رکھ دیا، جس میں 270 مہمانوں نے شرکت کی۔
سوشل میڈیا انفلوئنسر مارلی جیکس اور ان کے شوہر اسٹیو لارسن نے اپنی شادی کو یادگار بنانے کے لیے یہ انوکھا فیصلہ کیا۔ تقریب پر تقریباً 50 ہزار ڈالر کا خرچہ آیا، جس کے بعد انہوں نے مہمانوں کے لیے ٹکٹ رکھنے کا فیصلہ کیا۔
دلہا دلہن کے مطابق، یہ فیصلہ آمدنی کے لیے نہیں بلکہ ٹکٹ کی رقم کو تعلیم کے فروغ کے لیے کام کرنے والی ایک این جی او کو عطیہ کرنے کے لیے کیا گیا۔
جیکس اور لارسن نے ٹکٹ فروخت کر کے 96 ہزار ڈالر کمائے، ایک اور ایونٹ میں 36 ہزار ڈالر اکٹھے کیے اور یوں مجموعی طور پر تقریباً ایک لاکھ 32 ہزار ڈالر جمع کر کے افریقہ میں اسکول کی تعمیر کرنے والی تنظیم کو عطیہ کر دیے۔
مارلی جیکس نے بتایا کہ شادی کے لیے ٹکٹ بیچنے کا آئیڈیا انہوں نے انسٹاگرام پر مذاق میں شیئر کیا تھا، مگر لوگوں کے مثبت ردعمل کے بعد یہ حقیقت بن گیا۔ ان کا کہنا تھا کہ مقصد شادی سے منافع کمانا نہیں بلکہ مہنگی شادیوں کی فضول رسم کو ختم کر کے دنیا میں مثبت تبدیلی لانا تھا۔
