شہباز شریف نے امریکا اور ایران کو جنگ بندی کے بعد باضابطہ مذاکرات کے لیے 10 اپریل کو اسلام آباد آنے کی دعوت دے دی ہے، تاکہ دونوں ممالک کے درمیان جاری کشیدگی کا مستقل حل تلاش کیا جا سکے۔
وزیراعظم نے اپنے پیغام میں جنگ بندی کو خوش آئند قرار دیتے ہوئے کہا کہ انہیں اس پیش رفت پر بے حد خوشی ہے۔ انہوں نے دونوں ممالک کی قیادت کے فیصلے کو دانشمندانہ قرار دیتے ہوئے اس کا گرمجوشی سے خیرمقدم کیا۔
انہوں نے کہا کہ ایران اور امریکا اپنے اتحادیوں کے ساتھ مختلف محاذوں پر فوری جنگ بندی پر متفق ہو گئے ہیں، جسے خطے میں امن کی جانب ایک اہم قدم سمجھا جا رہا ہے۔ وزیراعظم کے مطابق دونوں فریقین نے غیر معمولی بصیرت اور سمجھ بوجھ کا مظاہرہ کیا ہے۔
ایرانی وزیر خارجہ کا پاکستان کو خراجِ تحسین، جنگ بندی میں کردار سراہا
Shehbaz Sharif نے مذاکراتی ٹیموں کو دعوت دیتے ہوئے کہا کہ وہ جمعہ کو اسلام آباد آئیں تاکہ تمام تنازعات کے حتمی حل کے لیے بامعنی بات چیت کا آغاز کیا جا سکے۔ انہوں نے امید ظاہر کی کہ یہ مذاکرات پائیدار امن کے قیام میں اہم کردار ادا کریں گے۔
وزیراعظم نے اس عزم کا بھی اظہار کیا کہ پاکستان خطے میں امن و استحکام کے فروغ کے لیے اپنی سفارتی کوششیں جاری رکھے گا، اور آنے والے دنوں میں مزید مثبت پیش رفت سامنے آ سکتی ہے۔
