پاکستان تحریک انصاف کے کل ہونے والے جلسے کو دیکھتے ہوئے شہر اقتدار اسلام آباد کے داخلی اور خارجی راستوں کو بند کرنے کا فیصلہ کرلیا گیا ہے۔
ذرائع کا کہنا ہے کہ ضلعی انتظامیہ اسلام آباد نے کل سڑکوں پر کنٹینرز لگانے کا فیصلہ کیا ہے، کنٹینرز رکھ کر شہر کے داخلی اور خارجی راستوں کو سیل کیا جائے گا، مری روڈ فیض آباد کے مقام پر بھی کنٹینرز سڑک کے اطراف رکھ دئیے گئے ہیں۔
جلسے میں جانے والے افراد ضلعی انتظامیہ کی جانب سے تعین کیے گئے راستوں کا استعمال کرکے جلسہ گاہ پہنچیں گے، تحریک انصاف نے کل ہر صورت اسلام آباد میں جلسہ کرنے کا اعلان کیا ہے۔
دوسری جانب لاہور کی انسداد دہشتگردی عدالت میں سانحہ 9 مئی کے کیسز کی سماعت ہوئی جس سلسلے میں وائس چیئرمین پی ٹی آئی شاہ محمود قریشی کو عدالت میں پیش کیا گیا۔
سماعت کے دوران وائس چیئرمین روسٹرم پر آگئے اور کہا کہ جب مقدمات درج کیے گئے تب پنجاب میں نہیں تھا، مجھے 1 سال 2 ماہ بعد حراست میں لیا گیا، جب میں رہا ہوا تو 9 مئی کیسز میں گرفتار کر لیا گیا۔
شاہ محمود قریشی کا کہنا تھا کہ سابق وزیراعظم عمران خان کا میں نائب کپتان ہوں، میں بھاگنے کا سوچ بھی نہیں سکتا، یہ لوگ ڈرتے ہیں اگر میں باہر آ گیا تو لوگ اکٹھے ہوں گے۔
