پنجاب اسمبلی کے اجلاس میں صوبائی حکومت کی جانب سے نیا سرکاری طیارہ خریدنے کا معاملہ زیر بحث آیا تو ایوان میں گرما گرم جملوں کا تبادلہ دیکھنے میں آیا۔ وقفۂ سوالات کے دوران محکمۂ اطلاعات سے متعلق امور پر بات چیت جاری تھی کہ اپوزیشن کی جانب سے طیارے کی خریداری پر سخت سوالات اٹھا دیے گئے جس سے ماحول کشیدہ ہو گیا۔
پاکستان پیپلز پارٹی کی رکن شازیہ عابد نے سوال کیا کہ کیا وزیر اعلیٰ پنجاب اربوں روپے مالیت کے نئے طیارے پر راجن پور کا دورہ کریں گی؟ اس پر صوبائی وزیر اطلاعات عظمیٰ بخاری نے جواب دیتے ہوئے کہا کہ اگر بلاول بھٹوسندھ حکومت کے جہاز پر سفر کر سکتے ہیں تو یہ پنجاب حکومت کا طیارہ ہے اور اسے استعمال کرنے کا اختیار بھی حکومت کو حاصل ہے۔
اپوزیشن لیڈر محسن ریاض قریشی نے استفسار کیا کہ طیارہ کس مد میں خریدا گیا اور اس کی حقیقی ضرورت کیا تھی۔ اپوزیشن اراکین نے احتجاجاً کاغذی جہاز بنا کر ایوان میں لہرائے اور خریداری کے فیصلے کو تنقید کا نشانہ بنایا۔
اس موقع پر اسپیکر نے ریمارکس دیے کہ اگر انہیں جواب دینا ہوتا تو وہ طیارے کی خریداری کا دفاع کرتے، تاہم یہ ان کی ذمہ داری نہیں۔ اجلاس کے دوران اپوزیشن کی جانب سے Imran Khan کی صحت اور قید سے متعلق بھی بات کی گئی، جس پر حکومتی اراکین نے جوابی تنقید کی۔
کے پی میں رمضان پیکج کا اعلان تاخیر کا شکار، عظمیٰ بخاری کی تنقید
حکومتی رکن احسن رضا کی جانب سے سخت الفاظ کے استعمال پر ایوان میں شور شرابا بڑھ گیا۔ اسپیکر نے غیر پارلیمانی الفاظ حذف کرنے کی ہدایت کرتے ہوئے واضح کیا کہ کسی بھی سیاسی قائد کے خلاف نامناسب زبان استعمال نہیں کی جائے گی۔
یاد رہے کہ پنجاب حکومت کی جانب سے وزیر اعلیٰ کے لیے نیا طیارہ خریدنے کی خبریں سامنے آئی تھیں، جس کی مالیت تقریباً دس سے گیارہ ارب روپے بتائی جا رہی ہے۔ اپوزیشن اس فیصلے کو غیر ضروری قرار دے رہی ہے جبکہ حکومتی حلقوں کا مؤقف ہے کہ یہ انتظامی ضروریات کے تحت کیا گیا اقدام ہے۔
