بنگلادیش کے الیکشن کمیشن نے گزشتہ روز ملک میں ہونے والے پارلیمانی انتخابات کے سرکاری نتائج جاری کر دیے ہیں۔
نتائج کے مطابق بنگلادیش نیشنلسٹ پارٹی (بی این پی) نے 299 نشستوں میں سے 212 نشستیں جیت کر واضح اکثریت حاصل کر لی ہے، جس کے بعد پارٹی کے رہنما طارق رحمان متوقع طور پر بنگلادیش کے اگلے وزیراعظم بننے جا رہے ہیں۔
سرکاری اعداد و شمار کے مطابق جماعت اسلامی 77 نشستوں کے ساتھ دوسری بڑی جماعت کے طور پر ابھری ہے۔ اس کے علاوہ نیشنل سٹیزن پارٹی (این سی پی) صرف 5 نشستیں جیتنے میں کامیاب ہوئی، جب کہ 30 میں سے باقی نشستیں کھو دی گئی ہیں۔ بنگلادیش کے ہاؤس آف دی نیشن (جاتیا سنگساد) کی 300 نشستوں میں سے ایک حلقے کا انتخاب جماعت اسلامی کے امیدوار کے انتقال کے باعث ملتوی کر دیا گیا تھا، جس کی وجہ سے مجموعی تعداد 299 حلقوں پر انتخابات ہوئے۔
بی این پی کے وزیراعظم کے امیدوار طارق رحمان کی جانب سے ابھی تک انتخابی نتائج پر کوئی براہِ راست ردعمل سامنے نہیں آیا، تاہم ان کی جماعت نے عوام سے درخواست کی ہے کہ فتح کے موقع پر خوشیاں منانے کے بجائے شکرگزاری کا جذبہ اپنائیں۔ پارٹی نے اس کامیابی کو ملک کی ترقی اور عوامی خدمت کے لیے ایک موقع قرار دیا ہے۔
کراچی:آئل ٹینکر اور بس سمیت متعدد گاڑیوں کی ٹکر، 13 افراد جاں بحق
دوسری جانب جماعت اسلامی نے بعض حلقوں میں الیکشن کمیشن پر جانبداری کے الزامات عائد کرتے ہوئے احتجاج کی دھمکی دی ہے۔ جماعت کے رہنماؤں نے عوام کو یقین دلایا کہ وہ ملک کی ترقی کے لیے سیاست کو تعمیری انداز میں آگے بڑھائیں گے اور صرف سیاست برائے سیاست نہیں کریں گے۔
تاریخی طور پر یہ انتخابات ملک میں سیاسی منظرنامے میں ایک اہم موڑ ہیں، کیونکہ بی این پی کی دو تہائی اکثریت بنگلادیش میں حکومت کے مکمل کنٹرول اور قانون سازی میں بھرپور اثر ڈال سکتی ہے، جبکہ جماعت اسلامی کی نمایاں پوزیشن آئندہ سیاسی مذاکرات اور پالیسیوں میں بھی اثر رکھے گی۔
