اسلام آباد میں مسجد و امام بارگاہ خدیجتہ الکبریٰ پر ہونے والے ہولناک خودکش دھماکے کے بارے میں قانون نافذ کرنے والے اداروں نے اہم شواہد جمع کر لیے ہیں۔ ذرائع کے مطابق نیشنل فارنزک ایجنسی اور نادرا کی مدد سے جائے وقوعہ پر تحقیقات کی گئی تاکہ حملے کی تمام پہلوؤں کو درست طور پر ریکارڈ کیا جا سکے۔
پولیس ذرائع کے مطابق حملہ آور نے مسجد میں داخل ہونے سے قبل راستے میں دو گولیاں چلائیں، جبکہ ہال میں داخل ہو کر مزید چھ گولیاں چلائیں، جن کے خول جائے وقوعہ سے برآمد ہوئے۔ اس کے بعد حملہ آور نے خودکش دھماکا کیا، جس میں تقریباً 4 کلوگرام بارودی مواد استعمال کیا گیا۔ بارودی مواد میں بال بیرنگ کی مقدار زیادہ تھی، جس سے دھماکے کی شدت اور جانی نقصان میں اضافہ ہوا۔
یاد رہے کہ گزشتہ روز اسلام آباد کے علاقے ترلائی میں امام بارگاہ و مسجد خدیجۃ الکبریٰ میں ہونے والے اس دھماکے میں 32 افراد شہید اور 150 سے زائد زخمی ہوئے تھے۔ پولیس اور دیگر ادارے دھماکے کی نوعیت اور حملہ آور کے نیٹ ورک کی شناخت کے لیے شواہد کو مرتب کر رہے ہیں تاکہ مستقبل میں اس قسم کے حملوں کی روک تھام ممکن ہو سکے۔
اسلام آباد: امام بارگاہ میں دہشت گرد حملے کے شہدا کی نماز جنازہ ادا
تحقیقات کے دوران اداروں نے جائے وقوعہ سے مختلف شواہد، جیسے دھماکے کے باقیات، گولیاں اور دیگر متعلقہ اشیاء اکٹھی کی ہیں۔ پولیس ذرائع کے مطابق یہ شواہد حملے کی نوعیت اور دہشت گرد عناصر کے طریقہ کار کو سمجھنے میں اہم کردار ادا کریں گے۔
مزید برآں، نیشنل فارنزک ایجنسی کی مدد سے دھماکے میں استعمال شدہ مواد کی نوعیت اور بارودی مرکب کی تصدیق کی گئی ہے، جبکہ نادرا کے ڈیٹا سے حملہ آور کی شناخت اور ممکنہ تعلقات کی چھان بین کی جا رہی ہے۔ اس جامع تحقیقات کے ذریعے حکام مستقبل میں حفاظتی اقدامات کو مزید مؤثر بنانے کا ارادہ رکھتے ہیں۔
