ضلع رحیم یار خان کے کچے کے علاقوں میں جاری پولیس آپریشن کے حوالے سے اہم پیش رفت سامنے آئی ہے۔ ڈی پی او رحیم یار خان عرفان سموں نے دعویٰ کیا ہے کہ کچے کا 90 فیصد علاقہ ڈاکوؤں سے کلیئر کر لیا گیا ہے اور پولیس کی کارروائیاں اب بھی پوری شدت کے ساتھ جاری ہیں۔
ڈی پی او عرفان سموں کے مطابق پنجاب اور سندھ کے سرحدی کچے کے علاقوں میں پولیس فورس مشترکہ حکمتِ عملی کے تحت ڈاکوؤں کے خلاف کارروائیاں کر رہی ہے۔ ان کا کہنا تھا کہ جدید ٹیکنالوجی، بالخصوص ڈرونز کی مدد سے ڈاکوؤں کے ٹھکانوں کی نشاندہی کی گئی، جس کے بعد کامیاب کارروائیاں عمل میں لائی گئیں۔
انہوں نے بتایا کہ حالیہ ڈرون کارروائیوں کے دوران ڈاکوؤں کے زیرِ زمین بنکرز کو نشانہ بنایا گیا، جب کہ مجموعی طور پر 33 ٹھکانے مکمل طور پر تباہ کر دیے گئے ہیں۔ ڈی پی او کے مطابق ان کارروائیوں سے ڈاکوؤں کے نیٹ ورک کو شدید نقصان پہنچا ہے اور ان کی نقل و حرکت محدود ہو کر رہ گئی ہے۔
دوسری جانب ڈی پی او راجن پور نے بھی کچے کے علاقوں میں بڑی کامیابی کا دعویٰ کرتے ہوئے بتایا کہ پولیس مقابلوں میں انتہائی مطلوب 8 ڈاکوؤں کو ہلاک کر دیا گیا ہے۔ ان ڈاکوؤں پر قتل، اغوا برائے تاوان اور دیگر سنگین جرائم کے مقدمات درج تھے اور یہ طویل عرصے سے قانون نافذ کرنے والے اداروں کو مطلوب تھے۔
حکام کے مطابق آپریشن کا مقصد صرف ڈاکوؤں کا خاتمہ نہیں بلکہ علاقے میں پائیدار امن کی بحالی بھی ہے۔ اسی لیے کچے کے جن علاقوں کو نوگو ایریاز قرار دیا گیا تھا، وہاں بتدریج پولیس چیک پوسٹس قائم کی جا رہی ہیں تاکہ دوبارہ جرائم پیشہ عناصر کو واپس آنے کا موقع نہ مل سکے۔
پنجاب کے کچے میں پولیس آپریشن: ڈرون حملے، سرجیکل کارروائیاں اور ڈاکوؤں کا سرینڈر
پولیس حکام کا کہنا ہے کہ جب تمام نوگو ایریاز مکمل طور پر کلیئر ہو جائیں گے تو وہاں تعلیمی اور صحت کی سہولیات فراہم کی جائیں گی۔ منصوبے کے تحت کچے کے علاقوں میں اسکول، بنیادی صحت مراکز اور دیگر عوامی سہولیات قائم کی جائیں گی تاکہ مقامی آبادی کو مرکزی دھارے میں لایا جا سکے۔
حکام کے مطابق کچے میں امن و امان کی بحالی سے نہ صرف مقامی شہریوں کو تحفظ ملے گا بلکہ پنجاب اور سندھ کے سرحدی اضلاع میں جرائم کی شرح میں بھی نمایاں کمی آئے گی۔ پولیس کا کہنا ہے کہ آپریشن اس وقت تک جاری رہے گا جب تک کچے کا ہر علاقہ مکمل طور پر محفوظ نہیں ہو جاتا۔
