امریکا کی معروف ایموری یونیورسٹی نے ایرانی سپریم نیشنل سکیورٹی کونسل کے سیکرٹری علی لاریجانی کی بیٹی فاطمہ اردشیر لاریجانی کو ملازمت سے برطرف کر دیا ہے۔ یہ پیش رفت ایسے وقت میں سامنے آئی ہے جب یونیورسٹی پر سیاسی دباؤ کی اطلاعات بھی گردش کر رہی تھیں۔
غیر ملکی میڈیا رپورٹس کے مطابق فاطمہ اردشیر لاریجانی ایموری یونیورسٹی کے میڈیکل اسکول سے وابستہ تھیں، جہاں وہ اسسٹنٹ پروفیسر کے طور پر ہیماٹولوجی اور میڈیکل آنکولوجی کے مضامین پڑھا رہی تھیں۔
ایموری یونیورسٹی کے ون شپ کینسر انسٹی ٹیوٹ کی جانب سے اس بات کی تصدیق کی گئی ہے کہ فاطمہ لاریجانی اب ادارے کی ملازم نہیں رہیں، تاہم یونیورسٹی انتظامیہ نے اس فیصلے کی وجوہات یا مزید تفصیلات فراہم کرنے سے گریز کیا ہے۔
واضح رہے کہ چند روز قبل امریکی ایوانِ نمائندگان کے رکن ارل کارٹر نے یونیورسٹی انتظامیہ کو ایک خط لکھا تھا، جس میں مطالبہ کیا گیا تھا کہ فاطمہ لاریجانی کو ملازمت سے برطرف کیا جائے اور ان کا میڈیکل لائسنس بھی منسوخ کیا جائے۔
یونیورسٹی کے اس فیصلے کے بعد معاملے نے تعلیمی اور سیاسی حلقوں میں نئی بحث کو جنم دے دیا ہے، جبکہ انسانی حقوق اور تعلیمی آزادی سے متعلق سوالات بھی اٹھائے جا رہے ہیں۔
