پولیس سرکل سرائے عالمگیر نے منشیات فروشوں کے خلاف کارروائی کرتے ہوئے دو ملزمان کو گرفتار کر کے لاکھوں روپے مالیت کی دو کلو سے زائد چرس برآمد کر لی ہے۔ کارروائی ڈی پی او گجرات رانا عمر فاروق کی قیادت اور ڈی ایس پی سرکل سرائے عالمگیر ڈاکٹر ممتاز احمد مکیں کی نگرانی میں کی گئی۔
تفصیلات کے مطابق، ایس ایچ او تھانہ سٹی سرائے عالمگیر احمد فراز تارڑ نے اپنی ٹیم کے ہمراہ کارروائی کرتے ہوئے منشیات فروش تنویر حسین کو گرفتار کیا اور اس کے قبضے سے 1140 گرام چرس برآمد کی۔ دوسری کارروائی تھانہ صدر سرائے عالمگیر کی جانب سے ایس ایچ او آفتاب رسول چوہان کی قیادت میں انجام دی گئی، جس میں ملزم محمد سلیم کو گرفتار کر کے 1240 گرام چرس برآمد کی گئی۔
پولیس نے دونوں ملزمان کے خلاف الگ الگ مقدمات درج کر کے مزید تفتیش شروع کر دی ہے۔ حکام کا کہنا ہے کہ گرفتار شدہ ملزمان سے مزید رابطے اور سپلائرز کے بارے میں معلومات حاصل کرنے کی کوشش کی جا رہی ہے تاکہ منشیات کی رسد کا مکمل نیٹ ورک بے نقاب کیا جا سکے۔
گجرات پولیس کا منشیات اور ناجائز اسلحہ فروشوں کے خلاف گرینڈ آپریشن
ڈی پی او گجرات رانا عمر فاروق نے اس موقع پر کہا کہ منشیات فروش معاشرے کے لیے ناسور ہیں اور ان کے خلاف بلا تفریق کارروائی جاری رہے گی۔ انہوں نے عوام سے بھی اپیل کی کہ وہ پولیس کے ساتھ تعاون کریں اور کسی بھی مشکوک سرگرمی کی اطلاع فوری دیں۔
پولیس حکام نے یقین دہانی کرائی کہ سرائے عالمگیر میں منشیات کی روک تھام کے لیے مستقل بنیادوں پر آپریشنز جاری رہیں گے تاکہ نوجوان نسل اور عوام کو اس مضر عنصر سے محفوظ بنایا جا سکے۔
