بنگلا دیش میں قتل کے مقدمے میں نامزد اسٹار کرکٹر اور عوامی لیگ کے سابق رکن اسمبلی شکیب الحسن پاکستان کے خلاف ٹیسٹ سیریز جیتنے کے بعد باقی کھلاڑیوں کیساتھ اپنے وطن واپس نہیں جارہے۔
ایئرپورٹ ذرائع کے مطابق پاکستان کے خلاف ٹیسٹ سیریز کے بعد سابق کپتان بنگلہ دیشی ٹیم شکیب الحسن وطن واپس نہیں گئے، سینئر کھلاڑی شکیب الحسن فی الحال کراچی سے دبئی روانہ ہوئے۔
قتل کے مقدمے میں نامزد بنگلہ دیشی کرکٹر شکیب الحسن گزشتہ رات ٹیم سے الگ ہوکر تنہا کراچی سے فلائٹ ای کے چھ سو سات سے دبئی پہنچے ہیں۔
سابق کپتان شکیب الحسن کیخلاف حکومت مخالف مظاہروں میں نوجوان کو قتل کرنے کا الزام ہے۔
دوسری جانب بنگلہ دیش کی ٹیم کے ارکان اور انتظامیہ نے کراچی ایئرپورٹ سے دو مختلف پروازوں سے دبئی اور قطر روانہ ہوگئے۔
وطن واپس جانے کے لیے بنگلا دیشی کھلاڑی اور آفیشلز رات گئے اسلام آباد سے کراچی پہنچے تھے۔
ذرائع کے مطابق بنگلہ دیشی کپتان شکیب الحسن کی بنگلا دیش واپسی کا فیصلہ عبوری حکومت کرے گی۔
واضح رہے کہ بنگلہ دیشی کپتان شکیب الحسن ایک مایہ ناز آل راؤنڈر اور عوامی لیگ کے سابق رکن اسمبلی بھی ہیں۔
