ڈی پی او جہلم طارق عزیز سندھو کی خصوصی ہدایات پر جہلم پولیس نے ضلع بھر میں سپیشل سرچ آپریشنز اور ناکہ بندی کا سلسلہ جاری رکھا۔ پولیس نے 14 مختلف مقامات پر سرچ آپریشنز کرتے ہوئے 195 گھروں اور 393 افراد کو چیک کیا۔
سرچ آپریشنز کا مقصد دہشت گردوں اور جرائم پیشہ عناصر کی سرکوبی کے ساتھ ساتھ اہم تنصیبات کی سیکیورٹی کو فول پروف بنانا تھا۔ دورانِ آپریشن شہریوں کی پولیس ایپلیکیشن کے ذریعے ویریفکیشن کی گئی جبکہ شہر کے داخلی و خارجی راستوں پر سپیشل ناکہ بندی کر کے سخت چیکنگ کی گئی۔
ڈی پی او جہلم طارق عزیز سندھو کا کہنا ہے کہ سرچ آپریشنز کا مقصد مجرمانِ اشتہاری، جرائم پیشہ اور سماج دشمن عناصر کی گرفتاری، ناجائز اسلحہ و منشیات کی برآمدگی اور شرپسند عناصر کو مذموم عزائم پر عمل سے باز رکھنا ہے۔ انہوں نے واضح کیا کہ ضلع میں امن و امان برقرار رکھنے کے لیے ایسے اقدامات آئندہ بھی جاری رہیں گے۔
