آسٹریلیا کے نامور ٹیسٹ کرکٹر عثمان خواجہ نے انٹرنیشنل کرکٹ سے ریٹائرمنٹ کا اعلان کر دیا ہے۔ وہ اپنی 15 سالہ طویل کرکٹ کیریئر کے اختتام پر سڈنی کرکٹ گراؤنڈ میں ایشیز سیریز کے دوران کھیلنے والے آخری ٹیسٹ کے بعد ٹیسٹ کرکٹ کو خیرباد کہیں گے۔
عثمان خواجہ اپنا 88 واں ٹیسٹ میچ کھیل کر رخصت ہوں گے، جس سے ان کے شائقین اور کرکٹ کمیونٹی کو ایک اہم کھلاڑی کے جانے کا احساس ہوگا۔
عثمان خواجہ نے 2011 میں آسٹریلیا کی جانب سے ٹیسٹ ڈیبیو کیا اور اپنے کیریئر میں 6 ہزار سے زائد رنز اسکور کیے۔ وہ آسٹریلیا کے پہلے پاکستان میں پیدا ہونے والے اور پہلے مسلمان ٹیسٹ کرکٹر ہیں، جنہوں نے نہ صرف میدان میں بلکہ فیلڈ کے باہر بھی نمایاں خدمات انجام دیں۔ عثمان خواجہ فاؤنڈیشن کے ذریعے انہوں نے ایک مثبت میراث قائم کی اور نوجوانوں کے لیے ایک مثال پیش کی۔
ریٹائرمنٹ کے قریب رونالڈو کو بین الاقوامی کیریئر میں پہلا ریڈ کارڈ
ریٹائرمنٹ کے اعلان کے بعد میڈیا سے گفتگو میں عثمان خواجہ نے جذباتی انداز اختیار کیا اور کہا کہ بطور پاکستان سے تعلق رکھنے والا مسلمان نوجوان انہیں بتایا گیا تھا کہ وہ کبھی آسٹریلیا کے لیے نہیں کھیلیں گے، مگر آج وہ یہ سب کچھ حاصل کرنے میں کامیاب ہوئے ہیں۔ انہوں نے کہا کہ ان پر اکثر غیر منصفانہ تنقید کی جاتی رہی، خاص طور پر ایشیز کی تیاری کے دوران ان پر الزامات لگائے گئے کہ وہ ٹیم کے لیے سنجیدہ نہیں ہیں، گالف کھیلتے ہیں اور ٹریننگ سے گریز کرتے ہیں۔
عثمان خواجہ نے نسلی اور دقیانوسی سوچ کا بھی ذکر کیا جس کا وہ طویل عرصے سے سامنا کرتے آئے ہیں۔ ان کے مطابق کئی کھلاڑی ایسے ہوتے ہیں جو انجری یا ذاتی مشاغل کی وجہ سے میچ سے پہلے سرگرمیاں کرتے ہیں مگر ان پر کبھی تنقید نہیں کی جاتی، جبکہ انہیں اس پر سوالات اور تنقید کا سامنا کرنا پڑا۔
عثمان خواجہ نے گزشتہ سال سری لنکا کے خلاف ڈبل سنچری بھی سکور کی اور کئی اہم ریکارڈ اپنے نام کیے۔ کرکٹ آسٹریلیا کے سی ای او ٹوڈ گرین برگ نے عثمان خواجہ کی خدمات کو سراہتے ہوئے کہا کہ انہوں نے آسٹریلوی کرکٹ میں اہم کردار ادا کیا اور ان کے کیریئر کی شاندار کارکردگی کے لیے ان کا شکریہ ادا کیا۔
عثمان خواجہ نے اب تک 87 ٹیسٹ، 40 ون ڈے اور 9 ٹی ٹوئنٹی میچز کھیل کر آسٹریلیائی کرکٹ میں اپنا نام روشن کیا ہے۔ ان کا آخری ایشیز ٹیسٹ 4 جنوری سے سڈنی کرکٹ گراؤنڈ میں کھیلا جائے گا، جس سے ان کے مداحوں کو ان کے کیریئر کا آخری نظارہ دیکھنے کا موقع ملے گا۔
