سندھ حکومت نے سابق وزیر اعظم اور چیئرپرسن پاکستان پیپلز پارٹی شہید محترمہ بینظیر بھٹو کی برسی کے موقع پر ہفتہ 27 دسمبر کو صوبے بھر میں عام تعطیل کا اعلان کر دیا ہے۔
اس حوالے سے صوبائی محکمہ محنت کی جانب سے کراچی سے جاری کردہ اعلامیے میں کہا گیا ہے کہ بینظیر بھٹو کی برسی کے احترام میں سندھ بھر کے تمام سرکاری اور نجی دفاتر، تعلیمی ادارے اور بیشتر کاروباری سرگرمیاں بند رہیں گی۔
اعلامیے کے مطابق شہید محترمہ بینظیر بھٹو کی برسی کی مرکزی تقریب گڑھی خدا بخش میں ان کے مزار پر منعقد کی جائے گی، جہاں ملک بھر سے پاکستان پیپلز پارٹی کے کارکنان، رہنما اور عوامی قافلے شرکت کریں گے۔ اس موقع پر شہر کے مختلف چوراہوں اور اہم مقامات پر استقبالیہ کیمپ بھی قائم کر دیے گئے ہیں تاکہ آنے والے شرکاء کو سہولیات فراہم کی جا سکیں۔
اسلام آباد میں 26 دسمبر بروز جمعہ کو نئی مقامی تعطیل کا نوٹیفکیشن جاری
واضح رہے کہ شہید محترمہ بینظیر بھٹو کو 27 دسمبر 2007 کو راولپنڈی میں پاکستان پیپلز پارٹی کے ایک جلسے کے بعد دہشت گردانہ حملے میں شہید کر دیا گیا تھا۔ ان کی شہادت کو آج بھی ملک کی سیاسی تاریخ کا ایک المناک اور اہم باب قرار دیا جاتا ہے۔
حکومتی ذرائع کے مطابق برسی کے موقع پر سکیورٹی کے خصوصی انتظامات کیے گئے ہیں جبکہ ٹریفک اور عوامی سہولت کے لیے بھی متعلقہ اداروں کو ہدایات جاری کر دی گئی ہیں۔
