انگلینڈ کے فاسٹ بولر جوفرا آرچر بائیں جانب اسٹرین کے باعث آسٹریلیا کے خلاف چوتھے اور آخری ایشز ٹیسٹ سے باہر ہو گئے، جس کے بعد انگلینڈ کے مایوس کن دورے کو مزید مشکلات کا سامنا ہے۔
انگلش کرکٹ بورڈ کے مطابق جوفرا آرچر کی جگہ فاسٹ بولر گس ایٹکنسن کو ٹیم میں شامل کیا گیا ہے۔ اس کے علاوہ بیٹنگ آل راؤنڈر جیکب بیتھل کو بھی ٹیم میں شامل کیا گیا ہے، اور وہ نمبر 3 پر اولی پاپ کی جگہ بیٹنگ کریں گے۔
اولی پاپ کو خراب فارم کے باعث چوتھے ٹیسٹ سے ڈراپ کر دیا گیا ہے۔ ان کی اس سیریز میں بہترین اننگز پرتھ ٹیسٹ میں 46 رنز رہی، تاہم اوپنر بین ڈکٹ نے ٹیم میں اپنی جگہ برقرار رکھی۔ بین ڈکٹ نے 6 اننگز میں 97 رنز بنائے جن میں زیادہ سے زیادہ اسکور 29 رہا۔
دوسری جانب انگلینڈ ٹیم کے ڈائریکٹر راب کی نے تصدیق کی ہے کہ دوسرے اور تیسرے ٹیسٹ کے درمیان کھلاڑیوں کی حد سے زیادہ شراب نوشی کی رپورٹس کا جائزہ لیا جائے گا تاکہ ٹیم کی ڈسپلن برقرار رہے۔
