بابائے قوم قائداعظم محمد علی جناح کا 149 واں یومِ پیدائش آج پورے ملک میں انتہائی عقیدت، احترام اور ملی جوش و خروش کے ساتھ منایا جا رہا ہے۔ اس موقع پر ملک بھر میں عام تعطیل ہے جبکہ سرکاری و غیر سرکاری سطح پر تقریبات کا اہتمام کیا جا رہا ہے جن میں بانی پاکستان کی عظیم جدوجہد اور ناقابلِ فراموش خدمات کو خراجِ تحسین پیش کیا جا رہا ہے۔
یومِ پیدائش کے موقع پر مزار قائد پر گارڈز کی تبدیلی کی ایک پروقار تقریب منعقد ہوئی۔ تقریب کے مہمانِ خصوصی میجر جنرل افتخار حسین چوہدری (ہلالِ امتیاز) تھے۔ اس موقع پر پاک فوج کے چاق و چوبند دستے نے مزار قائد پر سلامی پیش کی، جبکہ پاک فوج کے کیڈٹس نے باضابطہ طور پر گارڈز کے فرائض سنبھال لیے۔ تقریب میں عسکری اور سول حکام کے ساتھ شہریوں کی بڑی تعداد نے بھی شرکت کی۔
بانی پاکستان کے یومِ پیدائش پر دن بھر ملک کے مختلف حصوں میں سیمینارز، تقریبات اور دعائیہ اجتماعات منعقد کیے جا رہے ہیں، جن میں قائداعظم کی قیادت، اصول پسندی اور مسلمانوں کے لیے ایک آزاد ریاست کے قیام کی جدوجہد کو اجاگر کیا جا رہا ہے۔ تعلیمی اداروں میں خصوصی پروگرامز کے ذریعے نوجوان نسل کو قائد کے افکار سے روشناس کرایا جا رہا ہے۔
قائداعظم محمد علی جناح 25 دسمبر 1876 کو کراچی میں پیدا ہوئے۔ وہ ایک ممتاز وکیل اور عظیم سیاست دان تھے جنہوں نے اپنی بے مثال قیادت، عزم اور اصولی سیاست کے ذریعے برصغیر کے مسلمانوں کو ایک علیحدہ وطن دلایا۔ ایمان، اتحاد اور تنظیم ان کی فکر اور زندگی کا مرکزی نچوڑ تھا۔
قائداعظم کی رہنمائی آج بھی ہمارے لیے مشعلِ راہ ہے: صدرِ مملکت
نہرو، پٹیل اور گاندھی جیسے قدآور سیاست دانوں کی موجودگی میں قائداعظم نے مسلمانوں کو پاکستان کی منزل سے ہمکنار کیا۔ ان کا خواب ایک ایسا پاکستان تھا جہاں ہر شہری کو مساوی حقوق، مذہبی آزادی اور انصاف میسر ہو۔ قائداعظم دنیا کی اُن عظیم شخصیات میں شامل ہیں جنہوں نے تاریخ کا رخ موڑ دیا اور مسلمانوں کو ایک آزاد اور خودمختار ریاست عطا کی۔
یومِ پیدائش کے موقع پر وزیراعظم شہباز شریف نے بابائے قوم کو خراجِ عقیدت پیش کرتے ہوئے کہا کہ قائداعظم نے رنگ و نسل سے بالاتر ہو کر مذہبی ہم آہنگی، معاشرتی رواداری اور انصاف جیسے اصولوں کا درس دیا۔
افواجِ پاکستان، آرمی چیف اور چیف آف ڈیفنس فورسز فیلڈ مارشل عاصم منیر نے بھی قائداعظم کو خراجِ عقیدت پیش کیا اور ایک مضبوط، خودمختار، جمہوری اور خوشحال پاکستان کے وژن سے غیر متزلزل وابستگی کے عزم کا اعادہ کیا۔
