پاکستان انٹرنیشنل ایئر لائنز (پی آئی اے) کی نجکاری کے لیے بولی لگانے کا عمل آج مکمل طور پر شروع ہوگیا ہے، جس میں عارف حبیب گروپ نے سب سے زیادہ 115 ارب روپے کی بولی دے کر سب کی توجہ اپنی جانب مبذول کرائی۔
پی آئی اے کی نجکاری کے اس مرحلے میں تین بڑے کنسورشیم میدان میں تھے، جن میں عارف حبیب گروپ، لکی سیمنٹ کنسورشیم اور ایئر بلیو شامل تھے۔ لکی سیمنٹ کنسورشیم نے پی آئی اے کے شیئرز کے لیے 101 ارب 50 کروڑ روپے کی بولی دی، جبکہ ایئر بلیو کی جانب سے 26 ارب روپے سے زائد کی بولی دائر کی گئی۔
چئیرمین نجکاری کمیشن محمد علی نے میڈیا سے گفتگو کرتے ہوئے بتایا کہ پی آئی اے کی نجکاری حکومت کی پالیسی کے مطابق عمل میں لائی جا رہی ہے اور اس عمل کے ذریعے سرمایہ کاری کے نئے مواقع پیدا ہوں گے۔ ان کا کہنا تھا کہ حکومت کا مقصد ادارے کو فروخت کرنا نہیں بلکہ اسے مستحکم اور مالی طور پر خود کفیل بنانا ہے۔ انہوں نے مزید کہا کہ پی آئی اے کے 75 فیصد شیئرز کی فروخت آج مکمل ہوگی اور 90 دن کے اندر باقی 25 فیصد شیئرز فروخت کرنے کا فیصلہ کیا گیا ہے، جس سے ادارے کے لیے طویل مدتی مالی استحکام یقینی بنایا جائے گا۔
قومی ائیر لائن کی نجکاری کا پہلا مرحلہ مکمل، تین بولیاں جمع
محمد علی نے کہا کہ اس عمل میں دو بڈرز نے 100 فیصد خریدنے کی خواہش ظاہر کی، جبکہ دو دیگر نے 75 فیصد شیئرز خریدنے کی پیشکش کی ہے۔ انہوں نے مزید کہا کہ نجکاری کے بعد حاصل ہونے والے فنڈز میں 92.5 فیصد براہ راست پی آئی اے کے لیے خرچ ہوں گے تاکہ ادارے کی بحالی اور جدید کاری کے اقدامات مکمل کیے جا سکیں۔
عارف حبیب گروپ اور لکی سیمنٹ کنسورشیم نے پہلے مرحلے کے بعد اگلے راؤنڈ کے لیے کوالیفائی کر لیا ہے، اور اگلے مرحلے میں بیس پرائس 115 ارب روپے مقرر کی گئی ہے۔ نجکاری کے اس شفاف عمل کو حکومت اور نجکاری کمیشن کے ذریعے براہ راست میڈیا اور سوشل میڈیا پر بھی دکھایا جائے گا، تاکہ عوام اور سرمایہ کاروں کو ہر مرحلے کی مکمل معلومات فراہم کی جا سکیں۔
