وزیر دفاع خواجہ آصف نے فیلڈ مارشل سید عاصم منیر کی پاکستان کی ترقی کے لیے کی جانے والی کوششوں کی بھرپور حمایت کرتے ہوئے کہا ہے کہ ان کے کردار اور خدمات پر کوئی ابہام نہیں۔
خواجہ آصف نے کہا کہ برطانوی جریدے فنانشل ٹائمز نے فیلڈ مارشل عاصم منیر کو نہ صرف ڈپلومیسی میں کامیابی حاصل کرنے والا بلکہ بھارت کے ساتھ تعلقات میں مستحکم موقف اپنانے والا رہنما قرار دیا ہے۔ فیلڈ مارشل نے پاکستان کے دوست ممالک کے ساتھ تعلقات مضبوط کرنے اور سرد مہری کو ختم کرنے میں بھی اہم کردار ادا کیا ہے۔
وزیر دفاع نے مزید کہا کہ امریکی صدر ڈونلڈ ٹرمپ نے بھی فیلڈ مارشل کی کاوشوں کو سراہا ہے، جو عالمی سطح پر پاکستان کی مثبت شبیہہ بنانے میں معاون ثابت ہوئی ہیں۔ ان کا کہنا تھا کہ ملکی دفاع اور ترقی کے معاملات میں فیلڈ مارشل کی بصیرت اور قیادت قابلِ تحسین ہے اور یہ ملک کی خارجہ پالیسی کی مضبوط بنیادوں میں مددگار رہی ہے۔
واضح رہے کہ فنانشل ٹائمز نے فیلڈ مارشل سید عاصم منیر کو کثیر جہتی خارجہ پالیسی کا ماہر قرار دیتے ہوئے ان کے اسٹریٹجک اور سفارتی اقدامات کو عالمی سطح پر سراہا ہے۔ وزیر دفاع کے مطابق فیلڈ مارشل کی کوششیں پاکستان کے قومی مفاد اور علاقائی استحکام کے لیے انتہائی اہمیت رکھتی ہیں۔
