سابق وزیراعظم اور بانی پاکستان تحریکِ انصاف عمران خان کا کہنا ہے کہ وہ عوام کی آزادی لے کر رہیں گے یا اس راہ میں ہر قربانی دینے کے لیے تیار ہیں، لیکن اپنے مؤقف سے ایک انچ بھی پیچھے نہیں ہٹیں گے۔ ان کا کہنا ہے کہ موجودہ حالات میں عوام کے پاس احتجاج کے سوا کوئی راستہ نہیں بچا۔
یہ پیغام پی ٹی آئی کے سیکریٹری جنرل سلمان اکرم راجا نے خیبرپختونخوا ہاؤس اسلام آباد میں پریس کانفرنس کے دوران میڈیا کو دیا۔ ان کے مطابق عمران خان نے کہا ہے کہ ملک میں انصاف کے تمام دروازے بند کر دیے گئے ہیں، عدالتوں میں کیسز نہیں سنے جا رہے اور عدالتی نظام عملاً مفلوج ہو چکا ہے۔
سلمان اکرم راجا نے بتایا کہ بانی پی ٹی آئی کا واضح پیغام ہے کہ اب عوام کو خود سڑکوں پر نکل کر اپنی آواز بلند کرنا ہوگی۔ عمران خان کے مطابق عوام کے بنیادی حقوق سلب کیے جا رہے ہیں اور ایسے حالات میں خاموشی کوئی آپشن نہیں۔ انہوں نے تمام اسیران، خصوصاً خواتین قیدیوں کے ساتھ یکجہتی کا اظہار بھی کیا ہے۔
پی ٹی آئی سیکریٹری جنرل کا کہنا تھا کہ عمران خان نے پارٹی کو ہدایت دی ہے کہ اسٹریٹ موومنٹ کی تیاری فوری طور پر شروع کی جائے، کیونکہ اب سیاسی اور قانونی راستے مسدود ہو چکے ہیں۔ انہوں نے کہا کہ بانی پی ٹی آئی اپنی اہلیہ بشریٰ بی بی کی قید پر بھی شدید تشویش اور دکھ کا اظہار کر رہے ہیں، اور ان کا مؤقف ہے کہ بشریٰ بی بی کو محض ان کی اہلیہ ہونے کی وجہ سے نشانہ بنایا گیا ہے۔
عمران خان کا سزا کے بعد پہلا ردعمل: مسکراہٹ کے ساتھ اپیل دائر کرنے کی ہدایت
سلمان اکرم راجا نے حکومتی دعوؤں کو مسترد کرتے ہوئے کہا کہ یہ کہنا سراسر غلط ہے کہ عمران خان کو آزادانہ ملاقاتوں کی اجازت دی جا رہی ہے۔ ان کے مطابق آج بھی بانی پی ٹی آئی کی اپنے وکیل بیرسٹر سلمان صفدر سے صرف مختصر ملاقات ممکن ہو سکی۔ انہوں نے یہ بھی الزام لگایا کہ فیصلہ سنائے جانے کے وقت نہ عمران خان کو عدالت میں پیش کیا گیا اور نہ ہی ان کے وکلا موجود تھے۔
پی ٹی آئی قیادت کا کہنا ہے کہ موجودہ صورتحال نے عوام کو مایوسی کی طرف دھکیل دیا ہے، اور اگر انصاف اور آئین کی بالادستی بحال نہ ہوئی تو عوامی ردعمل مزید شدت اختیار کر سکتا ہے۔
