بنگلادیش میں سینیئر صحافی انیس عالمگیر کو ریاست مخالف سرگرمیوں کے الزام میں گرفتار کر لیا گیا ہے۔ پولیس کے مطابق انیس عالمگیر پر سابق وزیراعظم شیخ حسینہ کی کالعدم جماعت کی تشہیر کرنے اور انسدادِ دہشت گردی ایکٹ کے تحت عوامی لیگ کی بحالی کی سازش کرنے کے الزامات ہیں۔
انیس عالمگیر کو انسدادِ دہشت گردی ایکٹ کے تحت تین دیگر افراد کے ساتھ گرفتار کیا گیا ہے۔ پولیس کا کہنا ہے کہ انہوں نے ٹاک شوز اور سوشل میڈیا پوسٹس کے ذریعے پروپیگنڈا پھیلایا اور عوامی لیگ کے دوبارہ اثر و رسوخ بڑھانے کی کوشش کی۔
واضح رہے کہ بنگلادیشی عبوری حکومت نے مئی میں انسدادِ دہشت گردی ایکٹ میں ترامیم کے ذریعے شیخ حسینہ کی عوامی لیگ پر پابندی عائد کی تھی، جس کے بعد ملک میں سیاسی سرگرمیوں پر سخت کنٹرول رکھا جا رہا ہے۔
میڈیا کے مطابق، بنگلادیش میں صحافتی آزادی طویل عرصے سے خطرات کا شکار رہی ہے۔ رپورٹرز ودآؤٹ بارڈرز کی رپورٹ کے مطابق، بنگلادیش 2025 میں پریس فریڈم کی عالمی درجہ بندی میں 180 ممالک میں 149ویں نمبر پر ہے، جو اس بات کی عکاسی کرتی ہے کہ ملک میں میڈیا کے لیے حالات انتہائی مشکل ہیں۔
سماجی اور سیاسی حلقوں میں انیس عالمگیر کی گرفتاری پر تشویش کا اظہار کیا گیا ہے، اور ماہرین کا کہنا ہے کہ اس طرح کے اقدامات صحافتی آزادی اور شفافیت کے لیے نقصان دہ ہیں۔ بنگلادیش میں میڈیا تنظیموں نے بھی فوری رہائی اور قانونی کارروائی کے شفاف ہونے کا مطالبہ کیا ہے۔
