فیصل آباد ایئرپورٹ پر وفاقی تحقیقاتی ادارے (ایف آئی اے) نے کارروائی کرتے ہوئے دبئی جانے والی نجی پرواز کے 13 مسافروں کو آف لوڈ کر دیا۔
ترجمان ایف آئی اے کے مطابق آف لوڈ کیے گئے مسافروں میں 10 مرد اور 3 خواتین شامل تھے۔ ابتدائی اطلاعات کے مطابق یہ مسافر ظاہری طور پر دبئی کے ذریعے سعودی عرب کے شہر جدہ جا رہے تھے۔
ایف آئی اے کے ترجمان نے بتایا کہ مسافروں کو امیگریشن انٹرویو کے دوران مشکوک قرار دیا گیا، جس کے بعد مزید تفتیش کی گئی۔ اس دوران مسافروں کے موبائل فونز اور دیگر ڈیجیٹل آلات کی چھان بین کی گئی، جس سے مشکوک چیٹس اور نمبرز برآمد ہوئے۔ ایف آئی اے کے مطابق یہ شواہد مسافروں کے سفر کے مقاصد اور روابط کی وضاحت کرنے میں ناکافی تھے، جس کی بنیاد پر انہیں آف لوڈ کیا گیا۔
حکومتی موقف کے مطابق، آف لوڈ کرنا ایک حفاظتی اقدام ہے تاکہ ممکنہ سکیورٹی خطرات کو بروقت کنٹرول کیا جا سکے۔ ایف آئی اے نے واضح کیا کہ اس قسم کی کارروائیاں بین الاقوامی پروازوں میں مسافروں کی شناخت کی تصدیق، ملکی سرحدی سکیورٹی کو مضبوط بنانے اور غیر قانونی یا مشکوک سرگرمیوں کی روک تھام کے لیے ضروری ہیں۔ حکام نے کہا کہ یہ اقدام مسافروں کی حفاظت اور قومی سلامتی کو مدنظر رکھتے ہوئے کیا گیا۔
پاسپورٹ پر پروٹیکٹر مہر رکھنے والوں کو کسی صورت آف لوڈ نہیں کیا جائے گا، چوہدری سالک حسین
ایف آئی اے کے مطابق اس کارروائی کے دوران کسی کو گرفتار نہیں کیا گیا، تاہم مزید تفتیش جاری ہے تاکہ یہ یقینی بنایا جا سکے کہ مسافر کسی غیر قانونی سرگرمی میں ملوث تو نہیں۔ ترجمان نے شہریوں سے اپیل کی کہ وہ اپنے سفر کی دستاویزات اور شناخت کی تصدیق کے لیے تمام ضروری اقدامات مکمل کریں تاکہ کسی غیر ضروری رکاوٹ کا سامنا نہ ہو۔
فیصل آباد ایئرپورٹ پر اس کارروائی کے بعد حکام نے سکیورٹی اقدامات مزید سخت کر دیے ہیں اور بین الاقوامی پروازوں میں مسافروں کی شناخت اور دستاویزات کی جانچ کو مزید مؤثر بنانے کے لیے اضافی اقدامات کیے گئے ہیں۔
