بھارت کی سب سے بڑی ایئرلائن انڈیگو کو ایک بار پھر بڑے آپریشنل بحران کا سامنا کرنا پڑا ہے، جس کے نتیجے میں 1200 سے زائد پروازیں منسوخ کر دی گئیں۔
بھارتی میڈیا رپورٹس کے مطابق ملک کے مختلف شہروں میں ہزاروں مسافر ایئرپورٹس پر پھنس گئے اور کئی گھنٹوں تک صورتحال کے معمول پر آنے کا انتظار کرتے رہے۔
رپورٹس کے مطابق انڈیگو نے ایک روز قبل بھی 1232 پروازیں منسوخ کی تھیں، جبکہ سیکڑوں فلائٹس میں تاخیر ہوئی، جس کے باعث فضائی آپریشن شدید متاثر ہوا۔
مسافروں نے بتایا کہ ایئرپورٹس پر ہجوم بڑھ گیا ہے اور انہیں متبادل پروازوں یا ہوٹل کے انتظامات سے متعلق واضح معلومات فراہم نہیں کی گئیں، جس سے مسافروں کی مشکلات میں اضافہ ہوا۔
بھارت میں ایئر انڈیا کا طیارہ تباہ: بوئنگ 787 کا پہلا بڑا حادثہ، کئی اہم سوالات جنم لینے لگے
انڈیگو ایئرلائن نے وضاحت کی کہ پروازوں کی منسوخی کی بنیادی وجوہات تکنیکی خرابیوں اور بھارتی فضائی ریگولیٹر کے نئے آپریشنل قوانین ہیں، جنہوں نے شیڈول پر براہِ راست اثر ڈالا۔
ایئرلائن کے ترجمان نے کہا کہ کمپنی اس صورتحال کو جلد بہتر بنانے اور پروازوں کو باقاعدہ بحال کرنے کے لیے اقدامات کر رہی ہے، تاہم فلائٹس کی مکمل بحالی میں مزید وقت لگ سکتا ہے۔
ماہرین کے مطابق انڈیگو کے مسلسل آپریشنل بحران سے نہ صرف مسافروں کو مشکلات کا سامنا کرنا پڑ رہا ہے بلکہ ایئرلائن کی ساکھ اور مالی نقصان بھی بڑھ رہا ہے۔
ایئرپورٹس پر ہجوم، معلومات کی کمی اور فلائٹس کی مسلسل منسوخی نے بھارت کی فضائی سفری صنعت میں بھی خدشات پیدا کر دیے ہیں۔
مسافروں سے اپیل کی گئی ہے کہ وہ اپنے سفر کے شیڈول کی تصدیق کے لیے ایئرلائن کی ویب سائٹ یا کسٹمر سروس سے رابطہ کریں تاکہ غیر ضروری تاخیر اور پریشانی سے بچا جا سکے۔
انڈیگو نے مزید کہا کہ وہ متاثرہ مسافروں کے لیے متبادل انتظامات فراہم کرنے کی کوشش کر رہی ہے اور آئندہ کے لیے آپریشنز کو مستحکم کرنے کے منصوبے تیار کر رہی ہے۔
یہ بحران بھارتی فضائی صنعت کے لیے ایک بڑا چیلنج ہے، جس سے نہ صرف مسافروں بلکہ ایئرلائن کے روزانہ آپریشنز پر بھی منفی اثرات مرتب ہو رہے ہیں۔
