مسلم لیگ ن کے صدر محمد نوازشریف کی زیر صدارت اہم اجلاس منعقد ہوا، جس میں گوجرانوالہ ماس ٹرانزٹ پراجیکٹ کی باضابطہ منظوری دی گئی۔
اجلاس میں وزیراعلیٰ پنجاب مریم نواز اور وزیر دفاع خواجہ آصف بھی شریک ہوئے۔
نوازشریف نے اس موقع پر کہا کہ گوجرانوالہ کے عوام کا یہ حق تھا جو انہیں پہلے حاصل ہونا چاہیے تھا، اور اس منصوبے سے شہر کی ترقی اور شہریوں کو سہولت ملنے پر وہ بے حد خوش ہیں۔
میٹرو بس اور اورنج لائن کے لیے ڈیجیٹل پیمنٹ سسٹم متعارف، الیکٹرک رکشہ اور ٹی کیش کارڈ لانے کا فیصلہ
انہوں نے اس بات پر زور دیا کہ منصوبے سے نہ صرف ٹرانسپورٹ کا نظام بہتر ہوگا بلکہ شہر کی معیشت اور شہری معیار زندگی میں بھی بہتری آئے گی۔
اجلاس میں وزیر ٹرانسپورٹ بلال اکبر نے گوجرانوالہ ماس ٹرانزٹ پراجیکٹ کے تفصیلی پہلوؤں سے کمیٹی کو آگاہ کیا۔ بریفنگ کے مطابق منصوبہ ایمن آباد سے گھکھڑ تک 30 کلومیٹر سے زائد طویل ہوگا اور روزانہ تقریباً 51 ہزار مسافر اس سہولت سے مستفید ہوں گے۔
اس کے لیے 40 الیکٹرک آرٹیکولیٹڈ بسیں چلائی جائیں گی جو ماحول دوست ہوں گی اور شہری ٹرانسپورٹ کے نظام کو جدید خطوط پر استوار کریں گی۔
نوازشریف نے کہا کہ یہ تاریخی منصوبہ گوجرانوالہ کے شہریوں کے لیے سہولت اور آسانی کا سبب بنے گا اور شہر کی اقتصادی ترقی میں نمایاں کردار ادا کرے گا۔
منصوبے کے مکمل ہونے کے بعد شہری ٹرانسپورٹ کے معیار میں واضح بہتری آئے گی اور روزانہ ہزاروں مسافروں کو سفر میں سہولت میسر ہوگی۔
وزیر ٹرانسپورٹ نے مزید بتایا کہ پراجیکٹ میں جدید بسیں، ماحول دوست نظام اور شہری سہولت کے تمام پہلوؤں کو مدنظر رکھا گیا ہے تاکہ گوجرانوالہ میں عوامی ٹرانسپورٹ کے معیار کو بلند کیا جا سکے۔
اس منصوبے کی منظوری کے ساتھ شہر میں ٹرانسپورٹ کے جدید اور ماحول دوست نظام کی راہ ہموار ہو گئی ہے، جس سے نہ صرف شہری سفر میں آسانی ہوگی بلکہ شہر کی مجموعی ترقی اور شہری معیار زندگی میں بھی اضافہ ہوگا۔
