وزیراعظم کے مشیر رانا ثناءاللہ نے واضح کیا ہے کہ چیف آف ڈیفنس کی تعیناتی کے معاملے پر کسی قسم کا اختلاف موجود نہیں اور اس حوالے سے پھیلائی جانے والی قیاس آرائیاں حقیقت پر مبنی نہیں۔
نجی ٹی وی پروگرام میں گفتگو کرتے ہوئے انہوں نے کہا کہ چونکہ یہ نیا منصب حالیہ آئینی ترمیم کے تحت قائم کیا گیا ہے، اس لیے اس کے قواعد و ضوابط کی حتمی منظوری میں معمول کے مطابق کچھ وقت درکار ہے۔
رانا ثناءاللہ کے مطابق میڈیا میں چیف آف ڈیفنس کے نوٹیفکیشن سے متعلق غیر ضروری بحث جاری ہے، حالانکہ وزیراعظم آفس نے اس بارے میں نہ کوئی وضاحت جاری کی ہے اور نہ ہی ایسی کسی وضاحت کی ضرورت محسوس کی گئی ہے۔
انہوں نے یقین دلایا کہ چیف آف ڈیفنس کا نوٹیفکیشن آئندہ 3 سے 4 روز میں جاری کر دیا جائے گا۔
مشیرِ وزیراعظم کا کہنا تھا کہ میڈیا اور عوام چند دن صبر کریں، تمام امور مکمل ہونے کے بعد اس اہم تقرری کا باضابطہ اعلان جلد سامنے آجائے گا۔
