پنجاب بھر میں ٹریفک قوانین کی خلاف ورزیوں کے خلاف کریک ڈاؤن میں شدت آ گئی ہے اور صرف چار دن کے دوران 2 لاکھ 50 ہزار سے زائد چالان کیے گئے ہیں۔ ان چالانوں کے نتیجے میں مجموعی طور پر 25 کروڑ 73 لاکھ روپے کے جرمانے عائد کیے گئے ہیں۔
ڈی آئی جی ٹریفک پولیس پنجاب وقاص نذیر کے مطابق کارروائی کے دوران 49 ہزار 961 موٹرسائیکلیں اور گاڑیاں ضبط کی گئیں، جبکہ ون وے اور دیگر سنگین خلاف ورزیوں پر 18 ہزار سے زائد مقدمات درج کیے گئے، جن میں تقریباً 300 افراد 18 سال سے کم عمر کے تھے۔
وزیراعلیٰ پنجاب مریم نواز نے کم عمر ڈرائیورز کی گرفتاریاں روکنے کا حکم دیا اور سخت برہمی کا اظہار کیا۔ اس ضمن میں حکومت نے 16 سال سے کم عمر بچوں کے لیے اسمارٹ کارڈ اور موٹرسائیکل لائسنس کے اجرا کا اصولی فیصلہ بھی کیا ہے۔
صوبے بھر میں ٹریفک قوانین پر سختی سے عملدرآمد کے لیے گوجرانوالہ، فیصل آباد، راولپنڈی اور ملتان میں ڈرون کیمرے بھی نصب کیے جا رہے ہیں، جبکہ طلبہ کے لیے ٹریفک آگاہی ہفتہ بھی منایا جائے گا۔
