بھارتی ریاست اترپردیش کے گاؤں بھلوانی میں ایک حیران کن واقعہ پیش آیا، جہاں نئی نویلی دلہن نے سسرال پہنچتے ہی صرف 20 منٹ بعد طلاق کا مطالبہ کر دیا۔
دلہا وشال مدھیسیا نے گزشتہ ماہ 25 نومبر کو پوجا نامی لڑکی سے شادی کی تھی۔
اطلاعات کے مطابق بارات کی آمد، شادی کی تمام رسومات اور رخصتی کے بعد جب دلہن دلہا کے گھر پہنچی تو کچھ ہی دیر بعد اس نے شوہر سے علیحدگی کی خواہش ظاہر کرتے ہوئے واپس اپنے میکے جانے کی ضد کی۔
وشال کے گھر والوں اور تقریب میں موجود مہمانوں نے دلہن کو سمجھانے کی ہر ممکن کوشش کی لیکن پوجا نے نہ صرف رہنے سے انکار کیا بلکہ اپنے فیصلے کی وجہ بتانے سے بھی گریز کیا۔
دلچسپ بات یہ ہے کہ لڑکی کے اہل خانہ کو جب صورتحال سے آگاہ کیا گیا تو انہوں نے بھی بیٹی کو فیصلہ بدلنے پر قائل کرنے کی کوشش کی، لیکن ناکامی رہی۔
بعدازاں گاؤں میں پنچایت بلائی گئی جس میں دونوں خاندانوں کے درمیان تقریباً 5 گھنٹے تک بات چیت کی گئی، مگر کوئی حل نہ نکل سکا۔ پنچایت نے آخرکار مشورہ دیا کہ شادی ختم کر دی جائے، جس پر دونوں خاندانوں نے باہمی رضامندی سے طلاق کا فیصلہ کر لیا۔
علیحدگی کے بعد دونوں طرف سے شادی کے دوران دیے گئے تمام تحائف اور رقم بھی ایک دوسرے کو واپس کر دی گئی۔
