پاکستان تحریکِ انصاف کے رہنما شیخ وقاص اکرم نے کہا ہے کہ خیبر پختونخوا میں گورنر راج سے متعلق افواہیں کوئی نئی بات نہیں، علی امین گنڈا پور کے جانے سے پہلے بھی اسی قسم کی گفتگو چلتی رہتی تھی۔
پروگرام نیا پاکستان میں اظہار خیال کرتے ہوئے انہوں نے کہا کہ آج ایک بار پھر کسی مخصوص ایجنڈے کے تحت یہ معاملہ اٹھایا گیا ہے تاکہ وزیرِ اعلیٰ پر دباؤ ڈالا جا سکے۔
ان کا کہنا تھا کہ اگر وزیراعلیٰ کے خلاف منشیات یا دیگر الزامات کے حوالے سے شواہد موجود ہیں تو انہیں سامنے لایا جائے، ورنہ محض الزامات لگانا درست طرزِ عمل نہیں۔
شیخ وقاص اکرم نے تجویز دی کہ اگر وزیراعلیٰ کے خلاف بے بنیاد باتیں کی جا رہی ہیں تو انہیں ہتکِ عزت کا دعویٰ دائر کرنا چاہیے۔
انہوں نے مزید کہا کہ کسی جماعت کے عوامی مینڈیٹ کو سلب کرنا مناسب نہیں، اگر کوئی ایسا قدم اٹھانا چاہتا ہے تو پھر اس کے نتائج کے لیے بھی تیار رہنا ہوگا۔
