لاہور: وزیر اعلیٰ پنجاب مریم نواز نے واضح کیا ہے کہ پنجاب کے ہر مرلے، ہر کنال اور ہر ایکڑ پر صرف اصل مالک کا ہی قبضہ ہوگا۔ زمین یا پراپرٹی پر قبضے کے حوالے سے شہریوں کو ہدایت دی گئی ہے کہ وہ متعلقہ ڈپٹی کمشنر آفس میں درخواست دیں، جس پر چند دنوں کے اندر فیصلہ دیا جائے گا۔
وزیر اعلیٰ پنجاب کی سربراہی میں ہونے والے اجلاس میں پراپرٹی آرڈیننس کے مؤثر نفاذ پر تفصیلی بریفنگ دی گئی۔ بریفنگ کے دوران بتایا گیا کہ گزشتہ اقدامات کے دوران ایک ہزار سے زائد خاندانوں کو صرف 48 گھنٹوں میں زمین کی ملکیت کا حق واپس دیا جا چکا ہے۔ اجلاس میں یہ فیصلہ کیا گیا کہ اب پنجاب میں خواتین کے زمین کے مقدمات کو ترجیحی بنیادوں پر حل کیا جائے گا۔
مریم نواز نے کہا کہ زمین کا اصل مالک جب تک قبضہ نہ لے، فیصلہ مکمل نہیں ہے، اور یہ صرف کاغذی کارروائی تک محدود نہیں رہے گا۔ انہوں نے مزید کہا کہ زمین کے مقدمات میں فیصلے پر فوری قبضہ دیا جائے گا اور اس حوالے سے کوئی سفارش نہیں چلے گی۔
وزیرِ اعلیٰ پنجاب مریم نواز کا بے سہارا بیواؤں کے قبضہ کیسز فوری حل کرنے کا حکم
شہریوں کے لیے یہ واضح ہدایت بھی جاری کی گئی کہ اگر کسی زمین یا پراپرٹی پر قبضے کا مسئلہ درپیش ہو تو فوری طور پر متعلقہ ڈی سی آفس میں درخواست جمع کرائیں تاکہ قانونی کارروائی کے بعد حقائق کے مطابق فیصلہ کیا جا سکے۔
