وزیرِ تعلیم پنجاب رانا سکندر حیات نے کہا ہے کہ صوبے میں تعلیم کے شعبے میں اہم اقدامات کیے گئے ہیں اور ضمنی انتخابات میں ن لیگ کی کامیابی عوامی اعتماد کی علامت ہے۔
میڈیا سے گفتگو میں انہوں نے بتایا کہ پنجاب میں دن رات ترقیاتی کام جاری ہیں اور وزیراعلیٰ مریم نواز عوام کو زیادہ سے زیادہ سہولیات فراہم کرنے کے لیے متحرک ہیں۔
رانا سکندر حیات نے بتایا کہ پنجاب کے تمام تعلیمی اداروں میں ہفتے کی چھٹی مقرر کی گئی ہے جبکہ مستحق افراد کے لیے ہزاروں گھروں کی تعمیر مکمل ہو چکی ہے۔ انہوں نے کہا کہ کئی شہروں میں معیاری سفری سہولیات کی فراہمی کے لیے الیکٹرک بسیں بھی چل رہی ہیں۔
ان کا کہنا تھا کہ ہری پور میں ن لیگ کے ایک ورکر نے پی ٹی آئی امیدوار کو شکست دی، اور عوام نے ضمنی انتخابات میں کارکردگی کی بنیاد پر ن لیگ کو ووٹ دیا۔ انہوں نے کہا کہ خیبر پختونخوا کے طلبہ سوال اٹھا رہے ہیں کہ انہیں لیپ ٹاپس اور اسکالرشپس کیوں نہیں مل رہیں۔
صوبائی وزیر نے مزید کہا کہ ان کا خواب ہے کہ پنجاب کے تعلیمی مسائل کو مکمل طور پر حل کیا جائے۔ انہوں نے بتایا کہ وزیراعلیٰ پنجاب 11 لاکھ بچوں کو معیاری خوراک کی فراہمی یقینی بنا رہی ہیں۔
آخر میں انہوں نے دوٹوک مؤقف اختیار کرتے ہوئے کہا کہ تعلیم میں کسی قسم کی سیاست ہرگز نہیں ہونی چاہیے۔
