امریکا میں ٹرمپ انتظامیہ نے سابق صدر جو بائیڈن کے دورِ حکومت کے دوران ملک میں داخل ہونے والے تمام پناہ گزینوں کی وسیع جانچ پڑتال کا حکم دے دیا ہے، جس کے باعث ان کی گرین کارڈ درخواستوں پر کارروائی روک دی گئی ہے۔
غیر ملکی خبر ایجنسی کے مطابق حکومت کے اندرونی میمو میں ہدایت دی گئی ہے کہ بائیڈن دور میں امریکا پہنچنے والے پناہ گزینوں کی مکمل اسکریننگ تک ان کی امیگریشن پروسیسنگ آگے نہیں بڑھائی جائے گی۔
ذرائع کے مطابق ٹرمپ انتظامیہ کا کہنا ہے کہ جب تک اضافی جانچ پڑتال مکمل نہیں ہو جاتی، ان پناہ گزینوں کی مستقل رہائش (گرین کارڈ) کی درخواستوں پر مزید کوئی پیش رفت نہیں کی جائے گی۔
اس سے قبل بھی ٹرمپ انتظامیہ ویزا پالیسیوں میں سختی اور مختلف کیٹیگریز میں مدت محدود کرنے کے اقدامات کا عندیہ دے چکی ہے، جبکہ ایک امریکی عدالت نے واشنگٹن میں فوج کی تعیناتی سے متعلق انتظامیہ کی درخواست مسترد کی تھی۔
